Betre kvalitet med ny operasjonsmetode 

Det var første veka i oktober at gynekolog Bassam Odicho, overlege Johannes Carlsen og seksjonssjukepleiar Aud Lisa Kjøl kunne sjå metoden tatt i bruk ved Stord sjukehus.
– Den nye metoden gjer at inngrepet er enklare å utføre og reduserer risikoen for komplikasjonar som infeksjon og blødningar hos kvinna, seier gynekolog Bassam Odicho.

Betre livskvalitet
Det er gjerne kvinner over 55 år som opplever å få underlivsframfall, og særleg kvinner som har hatt fleire tunge fødslar. Tilstanden kjem som følgje av at støttefunksjonen i bekkenbotnen er redusert, noko som gjer at endetarm, livmor eller urinblære kan falle inn mot skjedeveggen. Dette gir ubehag, smerter og reduserer moglegheita til å vere fysisk og seksuelt aktiv.

Underlivsframfall blir behandla ved at eit nett i syntetisk materiale blir sett på plass for å kompensere for den manglande støttefunksjonen. No har altså gynekologane ved Stord sjukehus teke i bruk ein ny type nett og ein ny metode for å sette det på plass.
– Det nye nettet er mindre og er derfor ikkje eit så framtredande framandelement i kroppen. Dette reduserer risikoen for komplikasjonar og vil gi mindre smerter for pasienten, seier Odicho.

Over 100 pasientar årleg
– Mange trur Stord sjukehus ikkje er stort nok til denne type operasjonar, seier Johannes Carlsen.  Sanninga er at sjukehuset utfører denne operasjonen over 100 gonger årleg og får tilvist pasientar frå både Bergen og Stavanger.
– Stord sjukehus har lang erfaring og gode resultat med forløparen til dette inngrepet, og ventetidene er låge, fortel Carlsen.
Carlsen ser ikkje vekk i frå at fagmiljø ved andre sjukehus i landet vil vere interessert i operasjonsteknikken dei nyttar ved Stord sjukehus.


Bassam Odicho, Johannes Carlsen og Aud Lisa Kjøl ved Stord sjukehus. Foto: Eirik Dankel, Helse Fonna HF.