Champagnefrukost for reinhaldarane 

Måndag er kanskje den travlaste dagen på jobb for reinhaldarane i Helse Fonna. Reinhaldarane ved Haugesund sjukehus fekk likevel litt tid til å samle seg rundt eit langbord og feire seg sjølv. 


Skål: Reinhaldarene ved Haugesund sjukehus feirar seg sjølv. Framme til venstre sit einingsleiar for husøkonomi ved Haugesund sjukehus, Kjellfrid Skjervheim. På motsett side sit konstituert sjef for internservice i Helse Fonna HF, Leif Terje Alvestad. Foto: Eirik Dankel.

Den første måndagen i desember
Dagen i dag er litt ekstra spesiell, denne måndagen er reinhaldaranes dag. Markeringa i år er den ellevte året på rad. Den no nasjonale tradisjonen blei starta av reinhaldarane ved Ullevål sjukehus for å fokusere på viktigheita av reinhald etter å ha opplevd å vere eit lågstatusyrke.

Tradisjonen frå Oslo lever vidare i Helse Fonna. Tilsette på Valen, Stord og Odda har i dag motteke blomsterhelsing. Og i Haugesund samla reinhaldarane altså seg i kantina der Kjellfrid Skjervheim, einingsleiar for husøkonomi ved Haugesund sjukehus og Leif Terje Alvestad, konstituert direktør for internservice, diska opp med kake og (alkoholfri) champagne.

Det viktige reinhaldet
Det er mange gode grunnar til å vise fram den viktige jobben reinhaldarane gjer. Éin av dei er å senke sjukefråveret. Undersøkingar frå Ullevål synte nemleg at mykje av årsaka til det høge fråveret var at dei tilsette følte dei hadde eit lågstatusyrke. Reinhaldarane sin dag skal gjere andre tilsette og reinhaldarane sjølve meir bevisste på kor viktig ein reinhaldar er.

Dagen er òg ei påminning til oss alle om at det å bli sett og sett pris på i jobben er eit viktig tiltak for at tilsette skal trivast.

Ikkje ver redd for å skryte litt av reinhaldarane. Det har dei fortent.


Søt gratulasjon: Vel fortent merksemd for å markere reinhaldaranes dag. Foto: Eirik Dankel.