Heilskapeleg plan for psykiatri 

Administrasjonen har med dette fått mandat til å utarbeide ein plan for heile tenestetilbodet til pasientar med psykiske lidingar eller rusmiddelavhengigheit.

Målet er å sikre at pasientar får rett behandling til rett tid og på rett stad. Dette inneber at ein i planarbeidet må sjå på mellom anna organisering av tenestetilbodet, samhandling med primærhelsetenesta og forholdet mellom dagbehandling og behandling som inneber døgnopphald for pasienten. Styrking av det polikliniske tilbodet innan psykisk helsevern for både barn, unge og vaksne er ei overordna politisk målsetting.

Sikre kvalitet i tenestene
- Den faglege utviklinga i psykiatrien inneber meir dagbehandling og timeavtalar i staden for at pasienten skal leggast inn og bu på institusjonen. Dette gjeld både barn, ungdom og vaksne, seier administrerande direktør i Helse Fonna, Kari Ugland.

Plan for psykisk helsevern skal følgje opp den regionale planen for psykisk helse som blei vedteken av styret i Helse Vest 22. juni i år. Denne planen peikar særleg på:

• Tilbodet til barn og unge skal i første rekke bli gitt som polikliniske tenester med dagtilbod og ambulante tenester. Også i vaksenpsykiatrien skal ein halde fram med ei slik utvikling.
• Dei distriktspsykiatriske sentra må styrkast, mellom anna innan tilbod til eldre med psykiske lidingar. Sjukehusa skal få meir spesialiserte oppgåver.
• Arbeidet med å redusere bruken av tvang skal halde fram og styrkast.
• Pasientar med psykiske lidingar kombinert med rusmiddelbruk skal møte eit samanhengande tenestetilbod.
• Rekruttering og kompetansebygging, særleg innan barne- og ungdomspsykiatrien.
• Forsking.

Ikkje ny gjennomgang
Det gode arbeidet og materialet som ligg føre etter forbetringsprogrammet som blei gjennomført i første halvdel av 2011 skal brukast i planarbeidet.
Planen skal ikkje vere ein ny gjennomgang av klinikk for psykisk helsevern, men vere ei rettesnor i det langsiktige arbeidet med utviklinga av klinikken.

Brei involvering i arbeidet
Både administrerande direktør Kari Ugland og styret legg vekt på at ein i planarbeidet skal sikre brei involvering frå klinikk for psykisk helsevern. Brukarar, tillitsvalte og verneombod blir viktige ressursar. Eksterne fagpersonar skal delta i ei referansegruppe for å sikre eit blikk utanfrå.

Den ferdige planen skal leggast fram for styret i juni 2012.