Kjøkkenet ved Stord sjukehus stengt 

I samband med det omfattande bygg- og vedlikehaldsarbeidet som går føre seg ved sjukehuset er det teke asbest-prøvar jamleg. Tidlegare prøvar i kjøkkenområdet har vore negative. Etter tiltak knytt til ein mindre lekkasje har ein teke nye prøvar der asbest i støv på flater blei påvist. Kjøkkenområdet blei umiddelbart og rutinemessig stengt og sanering sett i verk. Ein kan ikkje seie på det noverande tidspunkt kor lang tid det vil ta før kjøkkenet kan opnas for drift.

Låg risiko
Tidlegare prøvar frå området har vore negative, og det har bare gått fire dagar mellom førre negative prøve og den prøven som påviste asbest. Helserelaterte konsekvensar av asbesteksponering er først og fremst dokumentert i samband med yrkeseksponering over lange periodar.
- Kort tids eksponering av asbest er i utgangspunktet rekna som lite farleg, seier seksjonsoverlege Atle Totland ved lungeeininga, Haugesund sjukehus.

Ingen konsekvensar for matforsyninga
Stenginga vil ikkje få konsekvensar for matforsyninga til pasientane. Det er oppretta mellombels kjøkken for tørrmat ved sjukehuset. Middag kjem frå ekstern leverandør i perioden.