Å utdanne helsepersonell er ei av hovudoppgåvene til Helse Fonna. For oss er det viktig å heile tida heve kompetanse til våre tilsette, og å ruste studentar til å kunne gjere ein god jobb etter endt utdanning gjennom praksisplassar.
Kompetanse og undervisning
Helse Fonna HF er ein kunnskapsbedrift, og all vår verksemd bygger på kompetanse innan ei rekke fagområde.
I tillegg til å nytte vår kunnskap i pasientbehandlinga, har vi mye kunnskap å formidle til andre, og det er òg ei av våre oppgåver som helseføretak.
I tråd med dette driv Helse Fonna undervisning og praksisopplæring av studentar, elevar og lærlingar. Studentar innan ulike helsefag har praksis i Helse Fonna.
Praksis for studentar
Samhandlinga mellom Helse Fonna og universitet, høgskular og andre utdanningsinstitusjonar når det gjeld praksis for studentar er ein viktig del av dette.
Vi har regelmessige samarbeidsmøte og samarbeidsavtalar. I tillegg blir det halde sporadiske møter gjennom heile studiet. Særleg tett er samarbeidet med Høgskulen Stord/Haugesund når det gjeld grunnutdanning i sjukepleie, og vidareutdanning for sjukepleiarar til akutt og kritisk sjuke.
Vidareutdanning
Når det gjeld andre vidareutdanningar for sjukepleiarar samarbeider vi mellom anna med Høgskolen i Stavanger, Betanien Diakonale Høgskole, Høgskolen i Bergen og Menighetssøsterhjemmets Høgskole i Oslo, om til dømes nyre-, kreft og gastrosjukepleie.
Opplæringstiltak
Opplæring internt er eit viktig oppgåve, og ei rekke interne opplæringstiltak blir årleg gjennomførte i Helse Fonna.