Felles EPJ: FASE 2 

Prosjektleiar for Felles EPJ i Helse Fonna Torbjørn Saltveit og assisterande prosjektleiar Karin Mortensen.

– Heile organisasjonen gjorde ein god jobb då vi bytta system til DIPS i vår. Vi er likevel ikkje heilt i mål, og vi skal bruke denne delen av prosjektperioden til å kome dit, seier Torbjørn.

– Fase 2 vil både innebere betring av måten vi bruker DIPS på og innføring av nye funksjonar. Innføring av elektronisk sjukepleiedokumentasjon, operasjonsplanlegging og SMS-påminning til pasientar er eksempel på nye ting vi skal i gang med.

Pasienten i fokus
Forbetring og nye funksjonar er vel og bra, men ein kan jo spørje seg om det ikkje var ein betre idé om vi heller fekk litt meir tid til å bli kjent med alt det nye?

– Eg trur ikkje det, svarar Karin. – Det er viktig å jobbe inn gode vanar medan dette er nytt. Det er lett å legge seg til uvanar eller finne eigne måtar å gjere ting på, og det er uheldig om det får sette seg.

Feil bruk av DIPS kan få store følgjer, både for pasientar og for Helse Fonna.  Karin viser til store medieoppslag frå andre føretak, der innkallingsbrev ikkje har blitt sendt ut til pasienten eller det har vore usikkert om prøvesvar har blitt lese av behandlingsansvarleg lege. Desse sakene har vore utløyst av ukorrekt bruk av DIPS. Føretaket kan òg gå glipp av viktige inntekter dersom ein ikkje
gjer opp konsultasjonar.

– Dersom vi klarer å motivere kvar medarbeidar til å bli med på denne betringsprosessen, vil det innebere vesentleg auka pasienttryggleik, seier Torbjørn.

Fagleg utvikling
Innføring av elektronisk sjukepleiedokumentasjon er noko det er knytt stor spenning til. Karin forklarar kvifor.

– EDS/Behandlingsplan, som delprosjektet heiter, blir ein ny måte å dokumentere på som handlar om mykje meir enn å gå frå manuell til elektronisk dokumentasjon. Det er eit viktig fagutviklingsprosjekt som vil kome pleietenesta til gode. Innføring av EDS vil gjere tydeleg den viktige rolla pleiepersonell har.

All dokumentering skal skje i DIPS, i ein ny modul som heiter DIPS Behandlingsplan. Kvar post skal lage rettleiande behandlingsplanar for sine pasientgrupper og planane skal brukast aktivt i behandlinga. I dokumenteringa skal vi bruke standardspråk for sjukepleiediagnosar og forordningar som heiter NANDA og NIC. Alt pleiepersonell vil få opplæring i NANDA og NIC.

– Når vi får ein standardisert måte å dokumentere på, kan rapportsituasjonen bli mykje enklare, seier Karin.

Også Torbjørn ser fram til innføringa av elektronisk sjukepleiedokumentasjon.

– Eg har sett DIPS Behandlingsplan, og det ser veldig bra ut. Denne delen av Felles EPJ Fonna Fase 2 vil òg bidra til auka kvalitet og pasienttryggleik, seier han.

Torbjørn og Karin er samrøystes i kva dei trur er suksesskriteria for Fase 2:

– Engasjerte medarbeidarar med lyst og vilje til å vere med på eit viktig løft for heile Helse Fonna. Akkurat slik vi såg i fase 1.