Graviditet og tilrettelegging: – Det handlar om å sjå moglegheitene 

– Arbeidstakaren bør informere om graviditeten så tidleg som mogeleg, og arbeidsgivaren pliktar gjennom Arbeidsmiljølova å leggje til rette arbeidsplassen eller arbeidsoppgåvene, seier Åse.

Ho råder til å etablere ein god relasjon mellom leiar og medarbeidar allereie før graviditet eller sjukdom blir aktuelt.

– Då blir det enklare å samarbeide og finne dei rette løysingane når behovet oppstår.

Potensialet for tilrettelegging er stort. Blant kvinnelege arbeidstakarar mellom 20 og 39 år, står gravide for ein tredel av alle fråversdagane, medan bare ein liten del av dette fråveret skuldast komplikasjonar i svangerskapet.

HR-avdelinga og HMS/Bedriftshelsetenesta er einkvar leiar sin gode støttespelar når medarbeidarar er gravide eller trenger tilrettelegging av andre helserelaterte årsaker. Dei kan regelverket, har kontakt med NAV og kan hjelpe med forslag til tilrettelegging.

– Vi kjenner og forstår leiarane sin situasjon. Dei har alltid ein ressurskabal som skal gå opp. Desto viktigare er det å få til gode løysingar!

Ho skjønar at nokon ser på tilrettelegging i svangerskapet som meir strev enn nytte. Ein gravid medarbeidar tenkjer kanskje at ho er til mindre bry for leiaren om ho bare sjukemeldar seg, medan leiaren kan vere bekymra for at prosessen skal vere tidkrevjande og økonomisk belastande.

Åse meiner ein alltid skal ha den gravide sitt beste for auge. Tilrettelegging på arbeidsplassen kan hindre svangerskapsrelaterte plager og bidra til eit tryggare svangerskap.

– Det er betre enn å bli så dårleg at ein må sjukemeldast, seier ho.

Kjelde: Gravid medarbeider. Å tilrettelegge er gull verdt. Brosjyre frå Idébanken.