Graviditet og den første tida som foreldre er ei sårbar tid for dei fleste av oss. Å streve med eigen psykisk helse og/eller avhengnad kan vere ekstra tungt i denne tida. Psykiske helseproblem eller rusutfordringar kan også vere ei belastning for familielivet og barnet. Vi jobbar for at gravide, foreldre og barn skal få best mogleg start saman.

Vi vil gjerne komme i kontakt med deg så tidleg som mogleg viss du er gravid eller nybakt forelder, og du eller partnar har utfordringar med psykisk helse eller rusmiddel.

Vi er opptekne av at tilbodet er tilpassa deg, behovet ditt og livssituasjonen til familien din.

Her er nokre av tenestene vi tilbyr

• Forsterka svangerskapsomsorg og samtalar for å førebu til fødsel og foreldreskap:
  • samtaler åleine eller saman med partnar, der vi fokuserer på dei utfordringane som du ønskjer hjelp med,
  • samtaler for å førebu deg/de på foreldrerolla,
  • førebuing til fødsel, barseltid og omsorga for eit nyfødd barn,
  • støtte til å omarbeide tankar om fødsel eller den første tida med ein nyfødd dersom dette vart krevjande/ikkje slik du hadde tenkt,
  • støtte og rettleiing i foreldrerolla og omsorga for barnet,
  • hjelp til å komme i kontakt med andre hjelpeinstansar viss du eller barnet treng det.
• Individuelt tilpassa oppfølging etter fødsel
• Bistand i møtet med hjelpeapparatet ved å vere ein «følgjevenn» til andre instansar.
• Samtalestøtte, rettleiing og råd knytt til foreldre/barn samspel og tilknyting og barnet sitt utvikling og behov
• Oppfølgande barneundersøkingar
• Hjelp til kartlegging av ressursar og hjelpebehov i familien

Vår oppgåve er å hjelpe barna gjennom å styrke foreldra sin omsorgskapasitet og kompetanse, og tidleg avdekke eventuell skeivutvikling hos barna. Vårt fokus er å styrka foreldre-barn samspel og tilknytning.

Tilbodet vårt har eit familieperspektiv der barnet er i fokus. Det er fleksibelt og individuelt tilpassa behovet til kvar enkelt familie. Vi kan følgje familien over lengre tid, om nødvendig fram til skulestart.

I tillegg til den kliniske verksemda, kan teamet gi tilbod om rettleiing, drøfting og konsultasjon til kommunale tenester og anna hjelpeapparat som brukarane er i kontakt med.

Vi kan:

• møte deg på kontora våre i Worumbygget, Karmsundgata 77 i Haugesund,
• avtale å komme heim til deg eller treffast andre aktuelle stader,
• tilby telefon- eller videokonsultasjon,
• komme på barselbesøk,
• vere med deg til andre hjelparar du har eller har behov for kontakt med.

Dersom du ønskjer å komme i kontakt med oss, kan for eksempel fastlegen din, jordmor, sjukehus eller andre tilvise deg til oss gjennom vanlege tilvisingskanalar. Du kan også sjølv ta kontakt på telefon for å høyre om vi kan tilby deg hjelp.

Vi ønskjer å vurdere tilvisingar fortløpande, og har som mål om at tilbod om oppfølging skal komme raskt i gong.

Førstegongs tilvising av den vaksne må skje i graviditet eller før barnet er 3 månader.

Barn som har vore eksponert for medikament eller rusmiddel i svangerskapet kan tilvisast etter 3 månader.

Barn av alvorleg psykisk sjuke kan tilvisast i første leveår.