Hysteroskopi

Hysteroskopi er ei enkel undersøking som kan gi verdifull informasjon om tilstandar i livmorhals og livmorhole, for eksempel polypper, muskelknutar, misdanningar eller samanklebbingar.

Gjennom instrumentet som blir ført via skjeden og inn i livmora, kan slike forandringar fjernast.

Før undersøkinga

Nokre gonger tilrår vi forbehandling av livmorhalsen med tablettar (Cytotec) som du set i skjeden kvelden før operasjonen. Tablettane kan gi menstruasjonsliknande smerter og kvalme.

Er du komen i overgangsalderen, tilrår vi bruk av lokal østrogen i skjeden i 14 dagar.

Dersom du har hatt langvarige eller uregelmessige blødingar, kan det vere aktuelt å behandle med Provera i 10–14 dagar før inngrepet.

Skal undersøkinga gjerast i lokalbedøving på poliklinikken, tilrår vi 1 g Paracet og 800 mg Ibux (dersom du toler Ibux) minst 1 time før undersøkinga.

Legen informerer deg om kva medisinar du eventuelt skal bruke før undersøkinga.

Sjølve undersøkinga

Ved hysteroskopi får du lokalbedøving eller narkose, alt etter type undersøking og tilstand.

Prøvesvar

Vev som blir fjerna, blir sendt til undersøking. Svar blir sendt til deg, til henvisande lege og til fastlegen. Det tek ofte 4–6 veker før du får svar.

Etter undersøkinga

Smerter

Vanlegvis lite smerter, men kraftige menssmerter kan førekome. Bruk Paracet og Ibux, eventuelt annan smertelindring som legen skriv ut, i eit par dagar etter inngrepet.

Bløding

Litt bløding er vanleg, men den minkar mykje i løpet av dei første døgna. Det er deretter vanleg med brunleg utflod som kan vare i 4–6 veker og lukte litt. Bruk bind, ikkje tampong (infeksjonsfare).

Fysisk aktivitet

Ver gjerne i aktivitet. Gå tur og rør på deg. Vent 1–2 veker med hard fysisk aktivitet, spesielt tunge mageøvingar, vektløfting og alt som gir tungt bukpress.

Dusjing

Du kan dusje same dag, men ikkje bade i badekar, basseng eller sjø så lenge du blør eller har brunleg utflod (minst 4 veker, kan vare opptil 6 veker).

Samleie

Unngå samleie dei neste 4 vekene (infeksjons- og blødingsfare).

Sjukmelding

Etter undersøking på poliklinikken er det vanlegvis ikkje behov for sjukmelding. Etter narkose kan det av og til vere nødvendig med inntil 2 dagar sjukmelding.

Komplikasjonar

Dette er eit rutineinngrep, og komplikasjonar er sjeldne. Ein sjeldan gong kan det oppstå hol på livmora under inngrepet, og då kan det vere nødvendig å liggje på sjukehuset til dagen etter. Dersom det blør, kan det bli nødvendig med ein liten operasjon for å stoppe blødinga.

Infeksjon er uvanleg, men kan førekome. Litt feber første kveld/natt er normalt.

Det er viktig at du får tissa i løpet av ettermiddagen operasjonsdagen. Dersom dette er eit problem, må du straks ta kontakt med gynekologisk avdeling – ikkje vent til neste dag. Dette for å unngå skade på blæra ved overstrekking.

Ta kontakt dersom

• Du får auka utflod kombinert med feber over 38,5 °C
• Sterke smerter
• Du føler deg sjuk og trur det har samanheng med inngrepet

Kontaktinformasjon

Gynekologisk poliklinikk (kvardagar kl. 08–15): tlf. 52 73 23 90

Gynekologisk sengepost: tlf. 52 73 23 10

Helg og heilagdagar: kontakt kirurgisk post: tlf. 52 73 24 20