Utgreiing av eit risikofylt alkoholforbruk skjer som regel parallelt med utgreiing/behandling av ulike fysiske eller psykiske plager. Alle organa i kroppen blir påverka negativt av alkohol, men mange er ikkje klare over at alkoholinntaket er ei utløysande årsak til sjukdommen. Derfor er det viktig at du kartlegg alkoholforbruket ditt saman med fastlegen.
Du kan lese meir om sjukdommar og helseplager utløyst eller forårsaka av alkohol i kapittelet om behandling, lenger nede på sida.
Eit skadeleg alkoholforbruk treng ikkje å vere einstydande med alkoholavhengnad. For mange vil derfor reduksjon av alkoholforbruk vere tilstrekkeleg for å halde oppe god helse. For nokon vil likevel alvoret eller utfordringa i sjukdommen med alkoholavhengnad gjere at fråhald frå alkohol er nødvendig.
Personar som drikk så mykje alkohol at det påverkar helsa eller fører til vanskar, bør kontakte fastlege/lege for å diskutere problemet. Å gripe inn tidleg, når problema ikkje har utvikla seg til å bli store, kan forhindre alvorlege konsekvensar, og gjere det lettare å gi formålstenleg hjelp. Generelt seier vi at det er lettare å redusere eller kutte ut alkoholen om du klarer å ta tak i problemet så tidleg som mogleg.
Eldre (personar over 70 år) toler alkohol dårlegare enn yngre, fordi forholdet mellom kroppsvæske og feitt blir endra med alderen. Alkoholen verkar dermed kraftigare på eldre. Dei får høg promille raskare. I tillegg er medisinbruken hos eldre høgare enn hos yngre. Alkohol og medikament lèt seg ikkje alltid kombinere, og derfor kan også eit moderat alkoholinntak føre til skadeleg påverking.
Du kan bli utgreidd for alkoholforbruket ditt ulike stader
Utgreiing av eit risikofylt alkoholforbruk kan gjerast både hos fastlegen, i kommunale lågterskeltilbod, i kommunale tilbod som krev tilvising og i spesialisthelsetenesta.