Gynekologisk kreft, kikholskirurgi

Vi anbefaler at du held deg i fysisk aktivitet og prøver å leve som normalt. Vi anbefaler røykeslutt, røyking aukar risikoen for komplikasjonar under og etter operasjon.

Du blir kalla inn til ei forundersøking/ poliklinisk time før operasjonen for at du skal få informasjon og for at vi skal planlegge inngrepet. Vi gjer undersøkingar av hjarte og lunger, og gjer ei gynekologisk undersøking med ultralyd. Ta med deg ei oppdatert liste over medisinane du bruker til forundersøkinga. 

• Du får beskjed om nødvendige førebuingar. Skal du til dagkirurgi, førebur du deg heime. Blir du lagd inn på sjukehuset dagen før operasjonen skjer førebuingane der.  
• Du må dusje (inkludert hårvask) og barbere bort kjønnshår som er synleg i ståande stilling. Bruk maskin -  ikkje høvel.  
• Naglelakk og alle smykke, ringar, armbandsur og piercing må vere tatt av – også giftering.
• Det kan i nokre tilfelle vere aktuelt med tarmtømming for operasjonen.
• Om vi mistenker at kreftsjukdommen affiserer tarmen, markerer vi på huda der du kan få utlagt tarm (stomi). 
• Du får roande tablettar før du blir køyrd ned til operasjon. Ved spesielle inngrep kan det vere andre rutinar som gjeld. Dette blir du orientert om på sjukehuset før operasjonen. 

Inngrepet blir utført i full narkose, og varer normalt i mellom 1-4 timar. 

Vi lagar eit snitt i navlen, og bukhola blir fylt med gass for å få betre oversikt. Laparoskopet, som er eit tynt røyr eller ein slags ”kikkert” med videotilknyting, blir ført inn gjennom snittet i navlen. Via ein tv-skjerm sjekkar vi bukhola, livmora, eggstokkar og eggleiarar. Når vi skal operere, treng vi fleire hjelpeinstrument og lagar derfor fleire små snitt til desse. Viss livmora skal fjernast, gjer vi i dei fleste tilfelle dette via skjeden. Men i nokre tilfelle må livmora fjernast via eit snitt på magen. 

Iblant kan det vere vanskeleg å gjennomføre operasjonen med kikhòlskirurgi. Vi vil i så fall skifte til ein vanleg operasjon (laparotomi) når du er i narkose. Vi avklarer som oftast risikoen for dette med deg før operasjonen startar. Av og til oppdagar vi ting under kikhòlsoperasjonen som gjer at vi må gå over til open kirurgi under sjølve operasjonen. Du må da rekne med å vere på sjukehuset nokre fleire dagar. 

Du ligg på overvaking i nokre timar etter operasjonen. Du kan drikke og eventuelt ete, avhengig om du kjenner deg kvalm.  

Heimreise 

Ofte er det mogleg å reise dagen etter operasjonen, men av og til er det nødvendig å ligge lenger på sjukehuset. Før heimreise får du informasjon om kva som er funnen og gjord under operasjonen. 

Smertar 

Litt bløding frå skjeden er vanleg. Dei første dagane kan du kjenne deg oppblåst i magen og kanskje ha vondt i skuldrene. Dette kjem av irritasjon frå gassen som blei sett inn i bukhola under operasjonen og kan som oftast lindrast med reseptfrie, smertestillande medisinar. 

Restriksjonar 

Viss livmora er fjerna, blir toppen lukka av skjeden med sting. Dette såret treng tid til å gro. For å sikre god tilheling anbefaler vi at du unngår karbad og svømmebasseng i 2 veker, og unngår bruk av tampong og samleie dei første 6-8 vekene. 

Dersom du ikkje har smerter eller andre plager kan du vere i vanleg fysisk aktivitet, men unngå tunge løft over 5 kg dei første to vekene. 

Urinblæra 

Somme kan oppleve manglande/unormal tømming av urinblæra. Dette kjem av påverknad av nervar til urinblæra og kan halde fram i nokre veker etter operasjonen. Du vil få opplæring i selvkateterisering (tømme blæra sjølv) på sjukehuset før du blir skriven ut. 

Bandasje 

Etter to døgn treng ikkje operasjonssårene på magen vere tildekt, bruk bandasje etter behov. Du får kjøpt bandasjar apoteket. Såra på magen er lukka med sjølvopplausleg tråd. Dersom du etter sju dagar framleis ser litt av den sjølvopplauslege tråden kan du klippe han varsamt vekk. 

Svar på prøver 

Det vi eventuelt fjernar under operasjonen, blir sendt til mikroskopisk undersøking. Du får vanlegvis svar på denne undersøkinga etter ca 3 veker via telefon, brev eller time på poliklinikken. Fastlegen din får kopi av svaret og brev om inngrepet. 

Sjukmelding 

Du får sjukmelding ved heimreise. Lengda på sjukmeldinga avheng av størrelsen på inngrepet og forventa tid du trengjer på å komme deg etter operasjonen. Sjukmeldinga kan forlengast av fastlegen din ved behov. 

Blodfortynnande medisinar 

For å minske risiko for blodpropp blir du mest sannsynleg anbefalt blodfortynnande medisin (sprøyter eller tablettar) som du skal ta sjølv i opptil 30 dagar etter operasjonen. Du får resept på dette før du reiser heim og dessutan resept på smertestillande tablettar.