Vi tilrår at du alltid nyttar siste versjon av nettlesaren din.
Hostemaskin, Cough assist
Hostemaskin kan brukast hos pasientar som har problem med å få opp slim frå luftvegane fordi dei har akutt eller kronisk nedsett hostekraft. Maskina blir kopla til munn-/nasemaske, og hjelper til å gi eit djup innpust etterfølgt av ein utpust. Den raske endringa frå innpust til utpust etterliknar normal hoste og bidrar til å få slim opp frå luftvegane.
Før
Om du bruker inhalasjonsmedisinar, bør du ta desse før behandlinga. Det kan også vere ein fordel med lungefysioterapi, slik at slimet er løyst nok til å bli hosta opp.
Under
Når du bruker hostemaskin, vil du vanlegvis få manuell hjelp til å hoste, av helsepersonell. Av den grunn bør det vere to personar til stades i behandlinga, ein til å halde maska og ein til å gi hostestøtte.
For å bruke hostemaskin er det nødvendig å ha slangesett som inkluderer filter, slange og maske eller svivel for tilkopling av ein tracheostomitube (for pustehjelp). På sjølve maskina stiller ein inn trykk, tid for innpust og utpust og kor lang pause imellom kvart host du skal ha (dette kan også styrast manuelt).
Behandlingstida blir tilpassa behovet ditt, men ofte bruker du maskina med 5–6 host på rad. Dette kan gjentakast opp til 6 gonger før du tar pause. Etter at du har hosta og losna slim, kan du enten spytte ut i eit papir eller fjerne slim med sug (omtrent som hos tannlegen).
Gjer det vondt?
I starten kan behandlinga vere ubehageleg, men dette går over når du har vent deg til korleis maskina fungerer og korleis du sjølv deltar i prosessen. I blant kan det vere nødvendig å fjerne slim i munn og svelg med eit sug. Nokon synest dette er ubehageleg.
Etter
Nokre pasientar har sjukdommar eller tilstandar som gjer at hostekrafta alltid er svak. Dersom dette gjeld deg, kan du ha behov for å bruke hostemaskin regelmessig i heimen. Dette kan du diskutere med ansvarleg behandlar.
Ved behov kan pasientar som bruker hostemaskin i heimen også få ei maskin med sug som dei kan ha heime, for å fjerne slim.
Ver merksam
Hos pasientar som er innlagde på sjukehus med akutt sjukdomsforverring, kan behandling med hostemaskin medføre at oksygen-mettinga blir litt låg undervegs. Dette betrar seg som regel raskt etter at behandlinga er ferdig.
Vi held til 2. etasje i nybygget mot sørvest på Haugesund sjukehus.
For å kome til oss går du inn hovudinngangen, forbi Narvesen kiosken og innover gangen i nybygget. Du kan ta heis eller trapp opp til 2. etasje. Der finn du ei ventesone. På døra finner du eit telefonnummer du kan ringe.
Parkeringshuset nord for sjukehuset er reservert pasientar og besøkande. Alle må betale for parkering. Dette gjer du på p-automatane enten med kort eller kontanter. I tillegg kan du benytte EasyPark appen.
Parkeringshuset har tre ladeuttak.
Reserverte parkeringsplassar
Reserverte plassar for HC-parkering er utanfor hovudinngangen. Hugs å legge parkeringsbeviset godt synleg i frontruta.
Det er reserverte plassar for blodgivarar og dialysepasientar på toppen av parkeringshus. Du vil få utlevert parkeringsbevis frå avdelingen dersom du har rett til å bruke dessa plassane.
Parkeringsavgift
Det er Haugesund Parkering Drift as som har oppfølging av parkeringshuset og parkeringane foran hovudinngangen. Eventuelle klager på p-avgift meldast til dei. Dette finn du også informasjon om på p-automatane.
Pris for å parkere på sjukehus i Helse Fonna er 25 kroner i timen. Makspris for eit døgn er 155 kroner.
Du kan endre timen din inntil 48 timar før oppmøte. Dette kan du gjere på helsenorge.no eller ved å kontakte oss på telefon 52 73 90 00. Kontaktsenteret vårt er opent kl. 07.30 – 15.30.
På helsenorge.no finner du informasjon om timen din i innkallingsbrevet.
Apoteket ligg i første etasje, like bak resepsjonen.
Opningstider:
Måndag-fredag kl. 08.00-16.30.
Mange pasientar og pårørande ønskjer å ta bilete eller video som eit minne frå tida på sjukehuset. Dette er sjølvsagt heilt greit, så lenge det er pasienten eller pårørande og vener det blir teke bilete av.
Det er ikkje lov å ta bilete av medpasientar eller tilsett ved sjukehusa. Vi har hatt fleire saker der bilete av medpasientar og tilsette har blitt publiserte på sosiale medium utan at dei har gjeve løyve om det.
Vi håpar at du syner respekt for personvernet til alle du møter under opphaldet ved sjukehuset, og at du bare tar bilete av eigen familie og vener.
Kantina i 6.etasje er open for tilsette, pasientar og besøkande.
Opningstider: Måndag - fredag kl. 09.30-15.30. Stengt helger og heilagdagar.
Pasientkantine i 4-og 5.etasje er kun open for pasientar.
Fleire av sengepostane har eigne spiserom med enkel sjølvbetening for inneliggande pasientar. Ta kontakt med di avdeling.
Ta med den faste medisinen du brukar. Det kan ta tid å få same medisin frå apoteket.
Dessverre kan tjuveri finne stad på sjukehuset. La verdisaker vere igjen heime.
Ta med behagelege klede og gode innesko som er stødige og lette å ta på. Av hygieniske grunnar er det ikkje tillate å gå barbeint på sjukehuset.
Ta med toalettsaker som tannbørste, tannkrem, kam, deodorant og eventuelt barbermaskin. Hugs også hjelpemiddel du er avhengig av: til dømes stokk, krykker, rullator og rullestol.
God hygiene er ein viktig faktor for å kunne gi god behandling til pasientane.
