Framre korsband er eit leddband som er viktig for å styre bevegelsen i kneet og forhindre at leggen glir framover. Det er også viktig for å kontrollere rotasjonen i kneet.

I nokre tilfelle ved korsbandskader kan det også menisken bli skadd. Dersom du får sydd menisken i tillegg til å få rekonstruert nytt korsband, vil du få eigne restriksjoner.

Du får eit innkallingsbrev der du får informasjon om møtetid og eventuelle førebuingar. Les dette brevet nøye.

Slik fastar du

Før operasjonen/undersøkinga må du faste. Dersom du ikkje møter fastande, kan det hende vi må avlyse eller utsetje timen.

Dei siste 6 timane før operasjonen/undersøkinga skal du ikkje ete mat eller drikke mjølk/mjølkeprodukt. Dei siste 2 timane skal du unngå drops og tyggegummi, snus og røyk, fordi dette kan auke mageinnhaldet og magesyra. Fram til 2 timer før kan du drikke klare væsker: vatn, saft, juice utan fruktkjøtt, brus, te og kaffi utan mjølk. Du kan svelgje medisinar med eit lite glas vatn inntil 1 time før. Du kan pusse tenner og skylje munnen når som helst.

• Mat og mjølk/mjølkeprodukt: stoppast 6 timar før
• Klare væsker, drops og tyggegummi, snus og røyk: stoppast 2 timar før

Dersom du likevel har ete eller drukke utanom desse tidene som står her, må personalet få vite det.

Hygiene

Dusj og vask håret heime på operasjonsdagen eller kvelden før.

• Ikkje ta på hudkrem eller sminke etter at du har dusja.
• Fjern ringar, klokker, kontaktlinser, sminke, neglelakk og piercingar før operasjonen. Dersom piercingar eller liknande ikkje er fjerna, kan du risikere at dei blir klipte.
• Briller og høyreapparat kan du ha på.

Operasjonen blir gjort i narkose og varer i om lag 1-2 timar. Narkose er den vanlegaste forma for bedøving. Du får sovemedisin direkte i ei blodåre, sovnar raskt og kjenner ikkje smerte under operasjonen.

For å undersøkje kneleddet på innsida brukar vi artroskopi (kikkholsteknikk). Då kan vi sjå skaden og eventuelt reparere den om det er mogleg. Dersom det også er skade på menisken, er det også mogleg å reparere/”frisere” den samtidig.

På framsida av kneet blir det laga to eller tre snitt på om lag ein centimeter, der kikkert og instrument blir førte inn. I tillegg blir det laga eitt snitt loddrett på kneet. Det blir skylt med saltvatn for å få betre oversikt. 

Eit nyoperert kne vil gjere vondt, men smerteopplevinga varierer frå person til person. Nokre smerter etter operasjonen må du rekne med, spesielt når bedøvinga går ut. Bruk smertestillande som avtalt ved heimreise. Smertene vil normalt avta etter eit par veker. Det kan vere smerte og heving i kneet i 4-6 veker etter operasjonen.

Du får bandasjar på såret. Du vil få nøye informasjon om behandling av såra og bandasjane før du reiser heim. Du kan ikkje bade før såra har grodd (ca. 2-3 veker). Dersom det er sting som skal fjernast, vil du få beskjed om dette.

Legen vil gi deg spesifikk informasjon om forløpet når det gjeld avgrensingar, opptrening og fysikalsk behandling. Er menisken sydd i tillegg, vil restriksjonane vere litt strengare.

Dei første dagane anbefaler vi at du sit med kneet høgt og har minst mogleg aktivitet. Dette er for å motvirke press og heving.  Det er likevel viktig å bevege foten, frå ankelen og ned, og bøye kneet etter dei avgrensingane som er gitt. Gjer dette fleire gonger om dagen for å unngå blodpropp og at kneet stivnar.

Det vil vere ganske stivt og ømt dei første dagane, så beveg det du klarer, utan å presse. Du bør fokusere på å prøve å rette kneet heilt ut (full strekk) fleire gonger om dagen, allereie frå første dag, men ikkje press det ned dersom det er svært smertefullt. Eit tips er å liggje med ei pute under hælen i lengre periodar og prøve å presse knehasen ned i senga/sofaen.

Etter operasjonen bruker du krykker for å avlaste/delbelaste kneet i 3-6 veker. Du må unngå vridningsbevegelser i kneet dei første 9-12 månadene. Kor mykje du kan belaste kneet, avheng av om du er operert for tilleggsskader, til dømes menisk, eller ikkje.

Det er lurt å bestille time hos ein fysioterapeut om lag 10-14 dagar etter operasjonen.

Sjukemeldinga bruker å vere om lag 6-12 veker.

Når det gjeld bilkøyring, kjem dette heilt an på kva fot du har operert og kva restriksjonar du får.