Personalgruppa er tverrfagleg samansett av legar, psykologar, sjukepleiarar, vernepleiarar, fysioterapeutar, ergoterapeutar, sosionomar, helsefagarbeidarar med fleire. Personalet har brei erfaring med pasientar som har vanskar med aggresjon, vald eller sjølvskading.
Alle pasientane har eit behandlingsopplegg som blir tilrettelagt for kvar enkelt. Allereie tidleg etter at pasientane kjem, får ein tilbod om tilpassa aktivitetar slik at dei skal få ein meiningsfylt kvardag.
Behandlinga kan bestå av miljøterapi, samtaleterapi, ergoterapi, trening og annan fysisk aktivitet. I tillegg er medisinar ein sentral del av behandlinga for mange.
Diagnostisk vurdering, kognitiv utgreiing og funksjonskartlegging inngår i behandlinga. Sentralt i arbeidet er også valdsrisikovurderingar, som er standard ved endring i oppfølging, ved permisjonar og ved utskrivingar.
Pasientane skal rehabiliterast tilbake til samfunnet. Det er derfor viktig å hjelpe dei med å ha orden i økonomi, ein stad å bu og at dei har meiningsfulle aktivitetar etter utskriving.
I samband med utskriving er bruk av ein plan for meistring av kriser eit viktig behandlingstiltak. Denne planen blir utarbeidd saman med pasienten og beskriv faresignal og teikn til forverring i psykisk helse. Tilpassa tiltak for å førebygge ytterlegare forverring vil vere beskrive i krisemeistringsplanen.
