Vestlandslegen
Dette er ein stor dag
Vestlandslegen til Helse Fonna.
– I dag er ein stor dag for oss! Det er ein stor dag for Universitet i Bergen, Høgskulen på Vestlandet, Helse Vest, Haugalandet, heile Helse Fonna-regionen, heile Vestlandet og heile Norge.
Det sa administrerande direktør Anders Hovland då han fekk nyheita om at Helse Fonna no blir tildelt utdanningsplassar for legestudentar gjennom Vestlandslegen.
Bringar av dei særskild gode nyheitene var helse- og omsorgsminister Jan Christian Vestre. Det gjorde han under eit møte ved høgskulen sin campus i Haugesund.
– Å få medisinutdanning her er ein milepæl for Haugalandet. Her skal vi utdanne framifrå legar. Det er viktig for framtida, og eg er sikker på at studentane her blir møtt med den beste kompetansen. Dette er eit skikkeleg løft for regionen, men også for helsevesenet, sa han.
Både rektor og dekan var på plass frå Universitetet i Bergen.
– Tusen tusen takk. Dette betyr enormt mykje. Ikkje berre er det ein gledens dag i den flotte byen Haugesund, det er også ein gledens dag for oss ved universitetet. Vi skal ta vare på studentane når dei er i Bergen, og vi er sikre på at de gjer det same når dei kjem hit.
Vestlandslegen vil sikre og styrke helsetilbodet
Vestlandslegen er ei desentralisert utdanning av legar. Dei tre første åra er studentane ved Universitetet i Bergen, medan dei tre siste åra av studiet blir gjennomført enten i Stavanger, Haugesund eller Førde.
– Utdanning av legar i form av Vestlandslegen er ikkje berre ein god og klok modell, den er avgjerande for gode, høgkompetente og likeverdige helsetilbod på hele Vestlandet og i Helse Fonna-regionen. Tildeling av disse studieplassane vil ikkje berre sikre og styrke spesialisthelsetenesta og sjukehusa, det skal også styrke legedekninga i kommunane, sa Hovland under møtet.
Les meir om Vestlandslegen i Helse Fonna.
Mange å takke
Førebuingane i Helse Fonna er allereie starta og skjer i samarbeid med kommunane, Universitet i Bergen, Høgskulen på Vestlandet, Haugesund Sanitetsforenings Revmatismesykehus, Helse Vest, Haugaland vekst og andre aktørar i regionen, forklara Anders Hovland.
– Saman skal vi sikre at legestudentane som kjem til Helse Fonna skal få eit flott og likeverdig utdanningstilbod som i resten av landet. Vi ønskjer og at dei skal få ei flott studietid og, etter kvart, arbeidsliv i vår region.
På ein stor dag som i dag er det mange som fortener ein takk for at dette blir ein realitet.
– Mange skal ha takk for at dette no blir ein realitet. Først statsråden og regjeringa for denne gode og viktige prioriteringa, deretter Universitetet i Bergen, Høgskulen på Vestlandet, styret i Helse Fonna og Helse Vest.
Men å få på plass Vestlandslegen har engasjert langt utover helsesektoren og utdanningsinstitusjonane. Interessa for å få det til har vore stor frå mange ulike aktørar rundt Helse Fonna.
– Eg vil verkeleg takke for engasjementet frå regionen si side for denne saka. Eg kunne nemnt så mange. Det er lokale politikarar, eldsjeler og engasjerte innbyggarar, og sist men ikkje minst fagpersonar både i Helse Fonna og kommunane som alle har vore tydelege på kor viktig dette er. Tusen takk og gratulerer med dagen til alle!