Vi tilrår at du alltid nyttar siste versjon av nettlesaren din.
Ansiktsskadar – akutte
Årsaker til ansiktsskadar kan vere trafikkulykker, fall, overgrep og idrett. Dersom du har brot i ansiktet, og brotkantane står frå kvarandre, vil du som oftast bli operert.
Tilvising og vurdering
Ved mistanke om brot i ansiktet blir du undersøkt av lege. Dersom fastlege eller legevaktlege finn grunn til å tru at du har fått eit ansiktsbrot, blir du tilvist vidare til undersøking hos øyre-nase-hals-lege eller kjeve- og ansiktskirurg.
Utgreiing
Ved mistanke om brot blir du som regel tilvist til røntgenundersøking. Ved hjelp av bilda vil ein kunne bekrefte eller avkrefte brot. Vurdering og behandling skjer fortløpande.
Dersom du har brot i ansiktet og brotkantane står frå kvarandre, blir du som oftast operert. Operasjonen blir gjord for å få beinkantane så godt saman som mogleg, og for å halde dei på plass. For å sikre dette blir det operert inn små titanplater som vi skrur fast med skruar i beinet. Titanplatene treng du som regel ikkje å fjerne.
Informasjon om ulike typar akutte ansiktsskadar
Overkjeven er festa mot naseskjelettet, kinnbeinet, augehòla og kraniet.
Brot i overkjeven kan føre til at tennene ikkje passar saman og at bitet endrar seg. I tillegg blir du hoven i ansiktet og kan blø i munnen. Brot i overkjeven på begge sider kan føre til at han kjennest laus og du får ei fjørande kjensle når du bit saman. Som oftast blir pasienten operert for å feste kjeven til faste delar av kraniet med små titanplater. På bildet ser du hovudinndelinga av brot i midtansiktet, ei inndeling som heiter Le Fort I, II og III.
Underkjeven sit opp mot overkjeven og er festa til hovudet med muskulatur og bindevev. Brot i underkjeven merkar du ved endring i bit, vanskar med å bite saman og ofte bløding frå munnen. Tenner kan losne og falle ut. Tenner som har falle ut må du ikkje kaste, men legge fuktig og ta med til tannlege/lege. Vi deler opp brota etter kor i underkjeven dei sit, og avgjer behandlinga ut frå dette.
Augehòla er eit pæreforma holrom med hol der det går blodårar og nervar.
Kinnbeinet er ein del av golvet og sideveggen av augehòla. Tyggemusklane går forbi kinnbeinbogen, og dersom denne blir brekt kan det gi vanskar med å opne munnen.
Den vanlegaste skaden i augehòla er eit såkalla utblåsingsbrot (blow-out fraktur), som vanlegvis involverer golvet og/eller veggen inn mot nasen. Kinnbeinbogen og kinnbeinet blir ofte brekt etter direkte slag mot området. Det er ikkje uvanleg med fleire brot samtidig:
brot i nedre augehòlekant
brot i ytterveggen i augehòla
brot i kinnbeinbogen
Fleire brot
Oppfølging
Etter at du er operert for ansiktsskaden blir du som regel innlagd til observasjon. Kontroll blir avtalt med behandlande lege.
Det tar litt lengre tid å bli frisk av brot i underkjeven enn andre brot. Du blir som regel sjukmeld i cirka to veker.
Du skal vere varsam med å tygge harde ting som nøtter og gulrøter i 8 veker etter operasjonen. Du kan likevel ete mat som krev tyggekraft, for eksempel knekkebrød eller poteter.
Felles akuttmottak ligg i underetasjen til Haugesund sjukehus, i nybygget mot sørvest.
Blir du transportert med ambulanse eller av portør, vil du automatisk bli registrert på akuttmottaket.
Viss du kjem sjølv, må du gå inn hovudinngangen til Haugesund sjukehus. Deretter går du forbi Narvesen-kiosken og innover gangen i nybygget. Du kan ta heis eller trapp ned til underetasjen. Du må registrere deg i ekspedisjonsluka før du kan kome inn til venteområdet på akuttmottaket.
Hovudinngangen til Haugesund sjukehus er alltid open.
Parkeringshuset nord for sjukehuset er reservert pasientar og besøkande. Alle må betale for parkering. Dette gjer du på p-automatane enten med kort eller kontanter. I tillegg kan du benytte EasyPark appen.
Parkeringshuset har tre ladeuttak.
Reserverte parkeringsplassar
Reserverte plassar for HC-parkering er utanfor hovudinngangen. Hugs å legge parkeringsbeviset godt synleg i frontruta.
Det er reserverte plassar for blodgivarar og dialysepasientar på toppen av parkeringshus. Du vil få utlevert parkeringsbevis frå avdelingen dersom du har rett til å bruke dessa plassane.
Parkeringsavgift
Det er Haugesund Parkering Drift as som har oppfølging av parkeringshuset og parkeringane foran hovudinngangen. Eventuelle klager på p-avgift meldast til dei. Dette finn du også informasjon om på p-automatane.
Pris for å parkere på sjukehus i Helse Fonna er 25 kroner i timen. Makspris for eit døgn er 155 kroner.
Du kan endre timen din inntil 48 timar før oppmøte. Dette kan du gjere på helsenorge.no eller ved å kontakte oss på telefon 52 73 90 00. Kontaktsenteret vårt er opent kl. 07.30 – 15.30.
På helsenorge.no finner du informasjon om timen din i innkallingsbrevet.
Apoteket ligg i første etasje, like bak resepsjonen.
Opningstider:
Måndag-fredag kl. 08.00-16.30.
Mange pasientar og pårørande ønskjer å ta bilete eller video som eit minne frå tida på sjukehuset. Dette er sjølvsagt heilt greit, så lenge det er pasienten eller pårørande og vener det blir teke bilete av.
Det er ikkje lov å ta bilete av medpasientar eller tilsett ved sjukehusa. Vi har hatt fleire saker der bilete av medpasientar og tilsette har blitt publiserte på sosiale medium utan at dei har gjeve løyve om det.
Vi håpar at du syner respekt for personvernet til alle du møter under opphaldet ved sjukehuset, og at du bare tar bilete av eigen familie og vener.
Kantina i 6.etasje er open for tilsette, pasientar og besøkande.
Opningstider: Måndag - fredag kl. 09.30-15.30. Stengt helger og heilagdagar.
Pasientkantine i 4-og 5.etasje er kun open for pasientar.
Fleire av sengepostane har eigne spiserom med enkel sjølvbetening for inneliggande pasientar. Ta kontakt med di avdeling.
Ta med den faste medisinen du brukar. Det kan ta tid å få same medisin frå apoteket.
Dessverre kan tjuveri finne stad på sjukehuset. La verdisaker vere igjen heime.
Ta med behagelege klede og gode innesko som er stødige og lette å ta på. Av hygieniske grunnar er det ikkje tillate å gå barbeint på sjukehuset.
Ta med toalettsaker som tannbørste, tannkrem, kam, deodorant og eventuelt barbermaskin. Hugs også hjelpemiddel du er avhengig av: til dømes stokk, krykker, rullator og rullestol.
God hygiene er ein viktig faktor for å kunne gi god behandling til pasientane.
