Vi tilrår at du alltid nyttar siste versjon av nettlesaren din.
Beinmargsprøve
Beinmerg finn vi i holrommet i mange av knoklane i kroppen. Det er her produksjonen av blodcellene skjer, både hos vaksne og barn. Ein beinmergsprøve viser korleis blodproduksjonen er, og om det eventuelt er teikn på sjukdom der. Prøven blir gjord med lokalbedøving. Det er vanleg å ta beinmergsprøve frå hoftekammen eller brystbeinet.
Kvifor blir undersøkinga/behandlinga gjennomført?
Dette er ei viktig undersøking for å studere og påvise sjukdom i blodcelledanninga. Undersøkinga blir gjord ved blodcellemangel (til dømes ved anemi) og ved mistanke om blodkreft (leukemi), lymfekreft, beinmergskreft (myelomatose) og spreiing av annan kreftsjukdom til beinmergen.
Korleis kan eg førebu meg?
Sei frå om du bruker blodfortynnande medisinar eller om du har reagert på lokalbedøving tidlegare. Enkelte blodfortynnande medikament må du stoppe med i god tid før undersøkinga. Ta kontakt med tilvisande lege dersom dersom du bruker dette.
Korleis skjer behandlinga/undersøkinga?
Lege/sjukepleiar vil først informere deg om undersøkinga, og korleis ho blir gjennomført. Beinmergsprøven kan vi ta frå hoftekammen (crista iliaca) eller brystbeinet (manubrium sterni).
Området der prøven blir teken blir vaska med desinfiserande middel, og du får deretter lokalbedøving. Du vil kjenne forbigåande svie/spreng av bedøvingsstikket. Bedøvinga har god og rask effekt. Legen set inn ei beinmergsnål og syg ut den flytande beinmergen (aspirat) og tek eventuelt også ut ein vevsbit (biopsi).
Gjer det vondt?
Sjølve beinmergsprøva kan vere litt ubehageleg, men skal ikkje gjere vondt. Når vi tek ut den flytande beinmergen, kan du kjenne eit kortvarig og ubehageleg sug eller press. Når vi skal ta ut vevsprøven er det vanleg å kjenne noko trykk/spreng i hofteregionen. Ein del kan kjenne smerte/ubehag nedover i beinet. Dette er ikkje farleg. Nokre kan kjenne lokal ømheit når bedøvinga går ut.
Dei fleste pasientane oppfattar undersøkinga som lite smertefull.
Kor lenge varer undersøkinga?
Undersøkinga, inkludert klargjering, bedøving og prøvetaking tek vanlegvis 15–20 minutt.
Etter
Etter prosedyren vil lege eller sjukepleiar komprimere innstikkstaden slik at eventuell bløding stoppar. Deretter dekkjer vi til såra med ein bomullspad og eit gjennomsiktig plaster. I somme tilfelle trengst noko lengre kompresjon, og du kan bli beden om å liggje på ryggen i nokre minutt til eventuell bløding har stoppa. Du kan bevege deg som normalt og reise heim rett etter undersøkinga, dersom ikkje anna er avtalt.
Sjekk innstikkstaden etter cirka ein halvtime for å sjekke at det ikkje blør. Ved bløding, trykk/komprimer, og forsterk eventuelt bandasjen. Du bør halde plaster/bandasje tørt i to dagar etter prøvetaking. Ved behov for å dusje i denne perioden, tilrår vi dusjbandasje. Deretter kan du fjerne bandasjen, men ved behov kan du setje på ein ny bandasje/plaster i nokre dagar til.
Det varierer når svaret på undersøkingane er klart, dette kan ta mellom nokre timar og fleire veker. Legen som er ansvarleg for behandlinga di, vil gi deg svar når resultatet ligg føre.
Biverknader og komplikasjonar
Bortsett frå ømheit i området i eit par dagar, er det veldig sjeldan med biverknader eller komplikasjonar frå undersøkinga.
Parkeringshuset nord for sjukehuset er reservert pasientar og besøkande. Alle må betale for parkering. Dette gjer du på p-automatane enten med kort eller kontanter. I tillegg kan du benytte EasyPark appen.
Parkeringshuset har tre ladeuttak.
Reserverte parkeringsplassar
Reserverte plassar for HC-parkering er utanfor hovudinngangen. Hugs å legge parkeringsbeviset godt synleg i frontruta.
Det er reserverte plassar for blodgivarar og dialysepasientar på toppen av parkeringshus. Du vil få utlevert parkeringsbevis frå avdelingen dersom du har rett til å bruke dessa plassane.
Parkeringsavgift
Det er Haugesund Parkering Drift as som har oppfølging av parkeringshuset og parkeringane foran hovudinngangen. Eventuelle klager på p-avgift meldast til dei. Dette finn du også informasjon om på p-automatane.
Pris for å parkere på sjukehus i Helse Fonna er 25 kroner i timen. Makspris for eit døgn er 155 kroner.
Du kan endre timen din inntil 48 timar før oppmøte. Dette kan du gjere på helsenorge.no eller ved å kontakte oss på telefon 52 73 90 00. Kontaktsenteret vårt er opent kl. 07.30 – 15.30.
På helsenorge.no finner du informasjon om timen din i innkallingsbrevet.
Apoteket ligg i første etasje, like bak resepsjonen.
Opningstider:
Måndag-fredag kl. 08.00-16.30.
Mange pasientar og pårørande ønskjer å ta bilete eller video som eit minne frå tida på sjukehuset. Dette er sjølvsagt heilt greit, så lenge det er pasienten eller pårørande og vener det blir teke bilete av.
Det er ikkje lov å ta bilete av medpasientar eller tilsett ved sjukehusa. Vi har hatt fleire saker der bilete av medpasientar og tilsette har blitt publiserte på sosiale medium utan at dei har gjeve løyve om det.
Vi håpar at du syner respekt for personvernet til alle du møter under opphaldet ved sjukehuset, og at du bare tar bilete av eigen familie og vener.
Kantina i 6.etasje er open for tilsette, pasientar og besøkande.
Opningstider: Måndag - fredag kl. 09.30-15.30. Stengt helger og heilagdagar.
Pasientkantine i 4-og 5.etasje er kun open for pasientar.
Fleire av sengepostane har eigne spiserom med enkel sjølvbetening for inneliggande pasientar. Ta kontakt med di avdeling.
Ta med den faste medisinen du brukar. Det kan ta tid å få same medisin frå apoteket.
Dessverre kan tjuveri finne stad på sjukehuset. La verdisaker vere igjen heime.
Ta med behagelege klede og gode innesko som er stødige og lette å ta på. Av hygieniske grunnar er det ikkje tillate å gå barbeint på sjukehuset.
Ta med toalettsaker som tannbørste, tannkrem, kam, deodorant og eventuelt barbermaskin. Hugs også hjelpemiddel du er avhengig av: til dømes stokk, krykker, rullator og rullestol.
God hygiene er ein viktig faktor for å kunne gi god behandling til pasientane.
