Lungeemboli blir forårsaka av ein blodpropp som har oppstått i dei djupe venene (blodårane) i beina eller bekkenet, og som har losna og vandra med blodstraumen mot lungene. Etter at proppen har sett seg lungekara, blokkerer den straumen av blod frå hjartet. Lungeemboli er ein akutt medisinsk tilstand som krev omgåande behandling med blodfortynnande medikament.
Symptom på lungeemboli inkluderer nyoppstått tungpust/andenød, smerter i brystet som ofte forverrar seg når ein trekker pusten djupt, hoste, avsviming og iblant hevelse eller smerter i eitt av beina.
Har du desse symptoma skal du kontakte fastlegen eller legevakta snarleg.
Du blir deretter vist til akuttmottaket for vidare utgreiing. Relevante undersøkingar inkluderer blodprøver og ein CT røntgen av lungene, av og til blir det tatt eit ultralyd av hjartet.
Lungeemboli blir behandla med blodfortynnande medikament for å hindre ytterlegare progresjon av proppen, og for å legge til rette for gradvis oppløysing av proppen. I enkelte tilfelle der lungeembolien er stor og pasienten er påverka med lågt blodtrykk, kan behandlinga innleiast med trombolytisk behandling (medikament som aktivt løyser opp proppen).
Behandlinga med blodfortynnande medikament blir gitt frå 3 månader til ubestemt tid avhengig av årsaka.
Du blir følgd opp poliklinisk på sjukehuset eller av fastlegen.
Du skal også greiast ut for mogleg underliggande årsak, blant anna arveleg disposisjon for blodpropp. Ved lungeemboli skal også behandlande lege gjere ei utvida klinisk undersøking for å vurdere moglegheita for underliggande kreftsjukdom.
Trass grundig utgreiing vil ein i ei rekke tilfelle ikkje avdekke ei utløysande årsak til at pasienten fekk blodpropp.
Behandling med blodfortynnande medikament gir auka risiko for blødingar. Ved alvorlege blødingar inkludert blødingar som ikkje stansar må du ta kontakt med fastlege/legevakt. I sjeldne tilfelle kan det oppstå blødingar i hjernen. Dette kan gi symptom som redusert bevisstheit, kraftsvekking eller problem med balanse eller taleevne.
Felles akuttmottak ligg i underetasjen til Haugesund sjukehus, i nybygget mot sørvest.
Blir du transportert med ambulanse eller av portør, vil du automatisk bli registrert på akuttmottaket.
Viss du kjem sjølv, må du gå inn hovudinngangen til Haugesund sjukehus. Deretter går du forbi Narvesen-kiosken og innover gangen i nybygget. Du kan ta heis eller trapp ned til underetasjen. Du må registrere deg i ekspedisjonsluka før du kan kome inn til venteområdet på akuttmottaket.
Hovudinngangen til Haugesund sjukehus er alltid open.
Karmsundgata 120
5528 Haugesund