Grå stær (katarakt) operasjon

Om du blir sjuk

Dersom du har ein infeksjon eller går på antibiotika når operasjonen nærmar seg, må timen som regel bli utsett. Ta kontakt med oss så tidleg som mogeleg ved teikn til infeksjon, som forkjøling, urinveisinfeksjon eller tannkjøttbetennelse.

Medisinar

Ta medisinane dine som vanleg med mindre du har fått ein annan beskjed. Dette gjeld også Marevan og andre blodfortynnande medisinar. Du kan få medisin for å roe deg ned før operasjonen om du ønsker dette. Du må då du ha med deg ein følgeperson.

Augedropar

Unngå augedropar som inneheld pilokarpin om morgonen på operasjonsdagen (Pilokarpin, Fotil, FotilForte, Isopto-Carbachol). Andre augedropar, til dømes ved grøn stær eller tørre auge, brukar du som vanleg. 

Hygiene og førebuingar

Det er viktig at du dusjar, tar på deg reine klede og ikkje brukar sminke på operasjonsdagen. Skal du ha narkose, må du møte fastande.

Praktiske forhold

Du kan ikkje køyre bil sjølv på operasjonsdagen. Sørg derfor for å avtale transport på førehand.

Når du kjem vil du få augedropar som utvidar pupillen dersom det ikkje ligg føre særlege forhold. Det kan bli noko ventetid før operasjonen, både fordi dropane treng tid for å verke og av andre praktiske årsaker.

Dei aller fleste pasientar får også lokalbedøving i form av augedropar. Lokalbedøvinga gjer at du under operasjonen vil kunne kjenne berøring, men ikkje smerte. Alternativt kan du få narkose som gjer at du søv under heile operasjonen.

Du må ligge på ryggen under operasjonen, og det er viktig at du ligg mest mogeleg avslappa. Innan operasjonen startar, vil sjukepleiar hjelpe deg med å justere leiet med puter slik at liggestillinga skal bli så behageleg som mogeleg for deg.

Sjukepleiar vil vaske og desinfisere området rundt auget som skal opererast, og legge eit sterilt dekke over ansiktet. Det blir laga god opning for nase og munn.

Augelegen opererer under mikroskop. Dette gir eit sterkt lys som kan kjennast litt ubehageleg i starten. Normalt ven ein seg raskt til det sterke lyset.

Under operasjonen blir linsa i auget ditt fjerna. Kapselen som omsluttar linsa blir normalt bevart. Deretter får du ein ny og klar linse av kunststoff, vanlegvis på same stad som der di eiga linse var. Sjølve inngrepet tar om lag 15 minutt.

Det er vanleg at synet er tåkete dei første dagane. Mange opplever også ei kjensle av rusk i auget. Dette går som regel over i løpet av 2-3 dagar.

Bruk skjold

Etter operasjonen får du eit skjold over auget.

• Behald skjoldet fram til du startar med augedropane.
• Bruk skjold om natta den første veka for å hindre at du kjem borti auget medan du søv.

Drypp auget etter skjema

Du skal dryppe auget etter dei instruksjonane som du får på operasjonsdagen. Dette kan vere i form av eit eige skjema eller brukarrettleiing på reseptane. Dropane er ein viktig del av behandlinga og beskyttar mot infeksjon.

• Du får beskjed om når du skal starte med dropane. Dette kan vere på operasjonsdagen eller dagen etter.
• Om du brukar andre augedropar frå før, kan du som regel fortsette med dei - med mindre du får ein annan beskjed.
• Ta i bruk nye flasker av alle augedropar du brukar etter operasjonen. Dette for å redusere faren for infeksjon på det opererte auget.
• Vask hendene dine godt før du dryp.

Forholdsreglar den første tida

For å unngå irritasjon og fremme god læking, bør du følge desse råda:

• Du kan dusje som vanlegk men unngå at vatn treff direkte i auget.
• Unngå tunge løft og anstrengande aktivitetar dei første fire vekene.
• Unngå å klø eller gni deg i auget, og unngå støt og trykk dei første vekene etter operasjonen.

Du kan elles leve som vanleg. Du kan bruke auga og lese så mykje du vil.

Kva kan du forvente etter operasjonen?

Her er nokon vanlege reaksjonar og praktiske forhold:

• Du kan ikkje køyre sjølv operasjonsdagen.
• Sjukmelding blir vurdert etter behov, vanlegvis 1-4 veker.
• Nye briller kan tilpassast etter 6-8 veker. Dersom begge auga skal opererast, er det ofte lurt å vente til begge auga er ferdige.
• Mange er ømfintlege for lys i starten, solbriller kan hjelpe for dette.
• Som oftast er det ingen sting som skal fjernast.