Hepatitt B kronisk

Hovudmålet er å hindre utvikling av skrumplever og leverkreft hos dei som har høge levertal over lengre tid. Følgjande grupper har ytterlegare auka risiko: afrikanarar > 20 år, asiatiske kvinner > 50 år, asiatiske menn > 40 år og dei med leverkreft i familien. I enkelte situasjonar, som under graviditet, kan det vere aktuelt med behandling for å redusere smittegrada, eller verne mot oppblussing av hepatitt B under immundempande behandling.

Korleis kan eg førebu meg?

Det kjem an på kva behandling du skal ha, interferon eller tablettar. Dersom du skal gjere eit forsøk med interferon bør du førebu deg litt ekstra, sidan behandlinga kan vere tøff både fysisk og psykisk. Det viktigaste er å tilpasse tidspunktet for ein interferon-kur til jobb, skulegang, reiser, planar om graviditet osv. Fastlegen bør også involverast sidan nokon kan trenge sjukmelding ein periode.

Tablettbehandling er enklare og treng mindre planlegging.

Interferonbehandling består av éi sprøyte i veka i 1 år. Dersom du skal i gang med tablettar er det oftast 1 tablett kvar dag i mange år.

Biverknader og komplikasjonar

For dei som skal bruke interferon vil det å setje ei sprøyte ein gong i veka kunne vere litt ubehageleg. Somme får også muskelverk, utslett og svimmelheit som biverknad. Dei tablettane ein bruker i dag (oftast tenofovir eller entecavir) er velkjende medikament med få biverknader.

Sidan mange får viruset tilbake i blodet når dei stoppar behandlinga, blir det hyppige kontrollar inntil prøvene har stabilisert seg.

Anten du står på behandling eller ikkje, må du til blodprøvekontroll minst 1 gong per år resten av livet. Det gjeld alle med kronisk hepatitt B-infeksjon, også dei med fine levertal og lite virus i blodet. Somme må også til ultralyd av levra 1-2 gonger per år, spesielt dei med skrumplever.

Kjelder for informasjon

Smittevernboka om Hepatitt B (Folkehelseinstituttet fhi.no)

Ofte stilte spørsmål

• Skal eg gå til kontrollar hos dykk eller hos fastlegen?
  Dei fleste med kronisk hepatitt B blir kalla inn til ein spesialistpoliklinikk for kontroll. Dersom du blir klassifisert som «inaktiv berar» kan du følgjast opp av fastlegen, men då må du sjølv bestille deg time éin gong i året.
  
  
• Kva gjer eg dersom fastlegen min ikkje veit kva prøver som skal takast når eg kjem dit på kontroll?
  Når du er ferdig greidd ut og legen her meiner du kan følgjast opp av fastlegen får både du og fastlegen din ei oppsummering av tilstanden din – inkludert i kva stadium du er i – og ei liste over dei prøvane som skal takast. For «inaktive berarar» er det Hgb, kvite, trombocyttar, ASAT, ALAT og S-HBVsAg 1 gong per år. Dersom ALAT stig igjen, og held fram med å vere høg utan at de finn ei anna forklaring, bør du visast tilbake til oss.
  
  
• Eg har både hiv og kronisk hepatitt B. Skaper det problem for behandlinga?
  Nei på ingen måte. Sidan du sikkert allereie bruker medisinar mot hiv, bruker du nok eitt av midlane som verkar på hepatitt B også: tenofovir eller lamivudin.