Tilpassing av høyreapparat

Før du kjem til den første timen, kan det kan vere lurt å tenkje over din eigen situasjon når det gjeld høyrsel.

• Er du motivert for å få høyreapparat eller anna høyrselsteknisk hjelpemiddel dersom det viser seg at du høyrer dårleg?
• I kva situasjonar kjenner du at du slit med å høyre?
• Kva forventningar har du?

Du må gjerne spørje familie eller venner om dei har lagt merke til endringar i høyrselen din.

I samarbeid med audiografen skal du finne ut korleis høyreapparata kan justerast for å få maksimalt utbytte av dei. Du skal også lære deg korleis du skal ta vare på dei.

For å klare overgangen til å bli høyreapparatbrukar, er det ein fordel at du er motivert for å bruke dei og har kunnskap om korleis dei fungerer.

Ved ditt første møte på øyre-, nase-, halsavdelinga vil du møte audiograf og eventuelt lege som utfører måling av høyrselen og undersøker øyrane dine. Deretter vil behovet for høyreapparat bli vurdert.

Du får nødvendig informasjon om bruk og stell av apparatet. For ein førstegongsbrukar dukkar det ofte opp mange spørsmål. Ta gjerne med deg ein pårørande som kan hjelpe deg å hugse informasjonen du får.

Kor lang tid tek behandlinga/undersøkinga?

Kor lang tid det tek, vil variere. Ta kontakt med avdelinga for informasjon om timen din.

Den første tida med nytt høyreapparat

Det er viktig å bruke prøveperioden godt. Bruk høyreapparata så mykje som mogleg og i ulike situasjonar. Noter deg dei erfaringane som du får. Merk at du ikkje skal bruke høyreapparata om dei gjer vondt.

Mange som tek i bruk høyreapparat blir overraska over kor mange lydar dei høyrer. Kvardagslydar som ein kanskje ikkje har høyrt på lenge. Slike lydar kan verke forstyrrande, spesielt når det er vanskeleg å høyre kva folk seier. Då er det viktig å vite at slike lydar er spesielt viktig å høyre for ein med svekt høyrsel. Dei bidreg til å vekkje tankar og kjensler ein utan høyreapparata vil gå glipp av. Tankar og kjensler bidreg til auka hjerneaktivitet, noko som er viktig for hjernehelsa di. Det er ein viktig del av tilvenninga å bli trygg og van med alle lydane som er rundt oss.

Kontroll og oppfølging

Du blir følgt opp med høyreapparatkontrollar hos audiograf i utprøvingsperioden. Fortel audiografen om erfaringane dine på kontrolltimen. Kor mange kontrollar du treng, er avhengig av korleis utprøvingsperioden går

Om du får problem med høyreapparata etter tildeling eller treng justering, må du ringe og bestille time på høyrselssentralen. 

Har du fått høyreapparat hos ein privat audiograf eller avtalespesialist, må du kontakte denne spesialisten for servicetime. 
 
Nav dekker utgifter til nye høyreapparat kvart sjette år. Audiografen din hjelper deg med søknad og vidare prosess. 

Det er ditt ansvar å forsikre høyreapparat.