Ved revmatologiske sjukdommar kan det oppstå hevelse i ledd på grunn av betennelse/sjukdomsaktivitet. Årsak til hevelsen er som regel auka mengde leddvæske. Vi kan tappe leddvæske og sette ei sprøyte med kortison for å behandle betente og hovne ledd.
Leddtapping blir gjord for å fjerne leddvæske i eit betent ledd. Du får mindre smerter i leddet etter leddtapping. Av og til tappar vi leddvæske som del av ei utgreiing når vi ikkje kjenner årsaka til leddhevelsen. Når det ikkje er mistanke om bakteriell årsak vil ein vanlegvis samtidig få sett inn steroid i leddet som behandling for å dempe betennelsen og hindre at hevelsen kjem tilbake.
Leddpunksjon hos barn blir ofte gjord med lokalbedøving eller i narkose, avhengig av individuell vurdering og alderen til barnet. Dersom det skal gjerast i narkose må barnet møte fastande, slik de vil få beskjed om i innkallingsbrevet.
Ved leddpunksjon i anklar/kne/hofter kan det vere lurt å ta med krykker. Utover det er det ingen førebuingar.
Legen undersøker deg før leddpunksjonen, ofte med hjelp av ultralyd.
Leddpunksjon er ein steril prosedyre. Ei nål blir ført inn i leddet og væska blir tappa ut. Av og til lèt det seg ikkje gjere å få ut noko væske. Dersom det dreier seg om ein steril betennelse i leddet (inflammatorisk leddsjukdom) vil legen som regel sette kortison inn i leddet gjennom den same nåla. Dette blir gjort for å dempe betennelsen.
Når vi lykkast med å tappe væske, kan legen finne det nødvendig å vurdere leddvæska i mikroskop og sende den til analyse for vidare oppfølging.
Etter behandlinga kan du reise heim. Avhengig av kva ledd som blir punktert, kan du bli beden om å avlaste leddet i etterkant. Nokon opplever smerter etter behandlinga, og andre ikkje. Dette kan avhenge av kva ledd som er behandla.
Ein svært sjeldan komplikasjon til leddtappingar er bakteriell infeksjon. Dersom leddet etter tapping blir meir hovent, smertefullt, raudt eller varmt eller du får feber må du kontakte poliklinikken eller annan lege.
Du finn oss i 3. etasje på Haugesund sjukehus. Ta trappene eller heisen ved Narvesen kiosken i 1. etasje for å kome til oss. Då kjem du rett til avdelinga vår i 3. etasje. Meld deg i skranken vår når du kjem.
Karmsundgata 120
5528 Haugesund