Periodiske beinrørsler under søvn (PLMS)

Periodiske beinrørsler under søvn (PLMS) blir karakterisert av episodar med gjentatte, einsarta beinrørsler under søvn.

Kjenneteikn

Desse beinrørslene blir kjenneteikna av at

du rykkvis bøyer stortær, anklar og kne
samantrekkingane kjem regelmessig natta gjennom

På engelsk blir tilstanden kalla «periodic limb movements in sleep», og understrekar at det ikkje berre er beina, men også armane som kan bevege seg. Beinrørsler er likevel klart vanlegast. Desse beinrørslene kan forstyrre søvnen, og gi hyppige oppvakningar. Det er ofte søvnproblem som fører pasienten til legen.

Utgreiing

Diagnosen blir stilt ved bruk av avansert søvnregistrering (polysomnografi). Ved mistanke om PLMS bør derfor fastlegen tilvise pasienten vidare til sjukehus/søvnsenter med kompetanse innanfor søvnregistrering. Somme personar kan ha slike beinrørsler utan andre symptom.

For at det skal kallast ei «liding» må pasienten i tillegg ha søvnvanskar eller auka søvnigheit på dagtid, utan at dette kan forklarast på annan måte. Alvorsgrada blir vurdert etter talet på beinrørsler per time. Diagnosen PLMS kan ikkje stillast utan slik registrering.

Behandling

Behandlinga er medikamentell, og tar sikte på å betre søvnkvaliteten og gi ein reduksjon i søvnigheita på dagtid. Det er fleire ulike preparat som er aktuelle, men førstevalet er dopamin-agonistar. Mange pasientar responderer godt på slik behandling.

Nokon medisinar kan utløyse periodiske beinrørsler og da er behandlinga å slutte med desse. Det er også medisinar som kan hjelpe og som mange responderer godt på.