Røntgen av matrøyr, magesekk og tolvfingertarm (ØVD) hos barn

Dette er ei røntgenundersøking av den øvre delen av fordøyingssystemet. Ved hjelp av røntgengjennomlysing undersøker vi matrøyret, magesekk og overgang til tolvfingertarmen. For at desse områda skal bli synlege på bilda, må barnet drikke kontrastmiddel under undersøkinga.

Denne undersøkinga blir også kalla røntgen ØVD. Forkortinga står for øsofagus (matrøyr), ventrikkel (magesekk) og duodenum (tolvfingertarm).

Før

Det er viktig at barn og unge som skal til undersøkinga er godt førebudde. Vi anbefaler derfor at foreldre og føresette les informasjonen nøye og forklarer barnet kva som skal skje.

Viktige førebuingar

Barnet skal faste før undersøkinga. Faste betyr at barnet ikkje skal ete, drikke, tygge tyggegummi eller bruke pastillar i denne perioden.

Barn under 2 år: Barnet skal ikkje drikke eller ete 2 timar før undersøkinga.
Barn over 2 år: Barnet skal ikkje ete mat dei siste 4 timane før undersøkinga.

Under

Barnet blir henta på venterommet av ein radiograf. På røntgenrommet må barnet som regel kle av seg på overkroppen. T-skjorte eller undertrøye utan metall eller pynt kan ofte behaldast på.

Under undersøkinga må barnet drikke kontrastmiddel. Kontrastmiddelet kan sjå ut som mjølk, kvitt og litt tjukt, men smaker lite. Vi kan tilsette sjokoladepulver for å gjere smaken betre. Av og til bruker vi kontrastmiddel som ser ut og smaker som saft.

Bilda blir stundom tatte mens barnet står, og andre gonger mens barnet ligg på ein undersøkingsbenk. Vi tar røntgenbilde mens barnet svelger små slurkar av kontrastmiddelet. Det kan også vere nødvendig at barnet snur litt på kroppen undervegs, slik at vi får bilde frå fleire vinklar.

Vi tar fleire bilde og det er viktig at barnet ligg roleg slik at bilda blir gode og tydelege.

Foreldre eller føresette kan vere med under heile undersøkinga. Gravide kan ikkje vere inne på røntgenrommet. Heile undersøkinga varer i 15 - 45 minutt.