Ultralyd er høgfrekvente lydbølger. Lydhovudet på ultralydapparatet sender lydbølger inn i kroppen og registrerer bølgene som kjem i retur. Lydbølgene blir analyserte og omdanna til eit bilete.
Vi utfører undersøkinga for å kunne stille ein sikker diagnose ved forandringar i lever, eller ved kontrollar av pasientar som har hatt kreft i tjukk- og endetarmen. Det blir gitt kontrastmiddel i blodåra (intravenøst) under undersøkinga. Ultralyd slik den vert nytta er ikkje skadeleg for kroppen.
Tilvising frå lege på sjukehuset eller primærhelsetenesta.
Du må faste dei siste fire timane før undersøkinga. Det vil sei at du ikkje må ete, drikke, tygge tyggegummi eller røyke før etter undersøkinga.
Eksakt informasjon om førebuing til undersøkinga vert gitt ved innkalling eller ved avdelinga når time blir avtalt.
Før sjølve undersøkinga får du innlagt ein tynn plastslange i ei blodåre på armen (veneflon). Du blir også spurt om eventuelle tidligare reaksjonar på kontrastmiddel.
Under undersøkinga ligg du på ein benk. Du må ta av klede som dekker det området vi skal undersøke. Det vert nytta gele på huda som aukar kvaliteta på bileta. Ein radiograf set kontrastmiddel gjennom nåla i arma di. Røntgenlegen flyttar lydhovudet over det aktuelle området medan vi tek ein serie av bileter. Undersøkinga varer som regel frå 15 til 30 minutt.
Etterpå vert du bedt om å sitje på venterommet i 30 minutt. Dette for å sikre at du ikkje reagerer på kontrastmiddelet i etterkant av undersøkinga.
Radiologi Haugesund
Du finn oss i 1. etasje på Haugesund sjukehus
Radiologi Stord
Du finn oss i 1. etasje på Stord sjukehus
Radiologi Odda
Du finn oss i 2. etasje på Odda sjukehus
Karmsundgata 120
5528 Haugesund
Tysevegen 64
5416 Stord
Sjukehusvegen 10
5750 Odda