Psykose er eit samleomgrep for ei gruppe alvorlege psykiske lidingar der hovudkjenneteikna er forstyrra røyndomsoppfatning (vrangførestillingar), sansebedrag (hallusinose) og forstyrra tale- og veremåte (disorganisering). Kjenneteikna (symptoma) oppstår på grunn av feilfunksjonar i hjernen – årsaka til dette er framleis ikkje kjend.
Personar med utviklingshemming kan også utvikle psykotiske lidingar, kanskje til og med oftare enn personar i den generelle befolkninga. Symptoma ved psykose vil påverkast av kor alvorleg grad av utviklingshemming personen har, og om det i tillegg ligg føre autisme eller anna tilleggsliding. Personar med alvorleg og djup utviklingshemming vil ha store vanskar med å fortelje om symptoma sine. Psykose hos denne gruppa vil derfor ofte halde fram med å vere uoppdaga.
Psykose hos menneske med utviklingshemming vil føre til funksjonsfall der innlærte ferdigheiter vil bli reduserte eller forsvinne heilt. Også evna til å snakke, kan forsvinne. Personen kan verke forvirra og desorientert i den akutte fasen. Psykose vil for dei fleste medføre alvorlege angstsymptom, spesielt i akuttfasen. Endra veremåte hos personar som har psykose kan vere skremmande. For pasientar med utviklingshemming er det særleg viktig at dei næraste pårørande får god informasjon.