Fagdag: Kvar går grensa – å forstå, vurdere og handtere seksuell åtferd

Om programmet

Barn, unge og vaksne med funksjonsnedsetjing har, som alle andre, rett til å utvikle ein sunn og positiv seksualitet. Samtidig kan fagpersonar møte situasjonar der det er vanskeleg å vurdere kva som er naturleg seksuell utvikling, kva som gir grunn til bekymring, og korleis ein bør handle.

Målet med fagdagen er å styrkje deltakarane sin kunnskap, tryggleik og handlingskompetanse i møte med seksuell åtferd hos personar med funksjonsnedsetjing.

Gjennom faglege innlegg, refleksjon og praktiske døme får deltakarane auka forståing av:

• kva som kjenneteiknar sunn seksualitet
• korleis identifisere bekymringsfull og skadeleg seksuell åtferd
• verktøy og tilnærmingar som kan støtte faglege vurderingar og oppfølging.

Arrangementet er gratis, men lunsj er ikkje inkludert.

Aktuelt for deg?

Fagdagen passar for fagpersonar i kommunane i Helse Fonna-regionen som arbeider med barn, unge eller vaksne med funksjonsnedsetjingar. Dette kan vere tilsette i barnehage, skule, PP-tenesta, barnevernet, helsestasjon og skulehelsetenesta, avlastingstenester, bustader for barn og unge eller bufellesskap og dagtilbod for vaksne.