Akuttmottak og overvåking, Odda

Vi bemannar den kommunale legevakttelefonen på telefon 116117.

Legevakttelefonen er tilgjengeleg 24 timar i døgnet, heile året, og er eit samarbeid mellom Odda sjukehus og Ullensvang kommune.

Lokala til den kommunale legevakta ligg i 1. etasje på Odda sjukehus.  

Når du kjem til oss, blir du møtt av sjukepleiar og lege.

På akuttmottaket har vi legar med ulike fagområde. Desse legane konfererer ofte med spesialistar på større sjukehus, avhengig av kva type medisinsk kompetanse ein treng.

Viss du ikkje er alvorleg sjuk eller skadd, må du berekne noko ventetid før du får snakke med ein lege.

Vi har traumeteam og medisinsk akutt team for både vaksne og barn. Vi har òg eit team for akutt hjerneslag.

Disse teama kan bestå av anestesilege, medisinsk eller kirurgisk overlege, anestesi- og operasjonssjukepleiar, sjukepleiar i akuttmottak, frå radiologiavdelinga eller laboratorieavdelinga. I barneteamet kan det også vere aktuelt å ha med jordmor.

Hjerneslagpasientar får akutt behandling og medisinar mot blodpropp (trombolyse) og blir overvaka hos oss.

Vi har òg moglegheit til å kople oss opp mot nevrologisk avdeling i Haugesund via videokommunikasjon.

Vi gjer elektrokonvertering (stabilisering av hjarterytme) for pasientar med hjarteproblematikk, og vi klargjer pasientar som skal vidare til Haukeland universitetssjukehus for utblokking av hjartearterier (PCI).

Vi har intensivpasientar som får pustestøtte/maskebehandling via respirator.

Intuberte pasientar som må ligge på respirator over lengre tid, blir stabilisert hos oss og sendt vidare til andre sjukehus.

Vi har ikkje noko standard køsystem for behandling. Vi behandlar dei sjukaste først.  

Basert på SATS-verktøyet gjer vi ei kort førehandsvurdering og prioritering av alle pasientar for å avgjere hastegraden. Det vil bli gjort ei rask undersøking og satt ei fargekode. Ventetida er avhengig av fargekoda di og talet på pasientar i mottaket. Vi har som mål at prioriteringa skal bli utført innan 15 minutt. 

Ventetida for behandling er stort sett kort hos oss, men er avhengig av hastegrad.

Rød

Akutt - tilnærma ingen ventetid. 

Oransje

Hastar - du skal raskt bli sett til av lege. 

Gul

Hastar litt - dette gjeld deg som er sjuk eller skada, men utanfor umiddelbar livsfare. 

Grøn

Hastar ikkje - gjeld deg som er sjuk eller skada, men ikkje nødvendigvis treng medisinsk hjelp umiddelbart. 

Blå

Du har blitt vist til skadepoliklinikken, og du har ei tilstand som tilseier at du ikkje treng ein full vurdering av hastegrad. Du vil bli tatt imot etter kvart som legane er ledige.

Sei i frå viss tilstanden din forandrar seg. Vi gjer så godt vi kan for å hjelpe deg og andre pasientar. 

I møte med lege og sjukepleiar vil det bli gjort undersøkingar som det kan ta tid å få svar på. Det kan vere behov for å ta ulike prøvar der det kan vere noko ventetid. Eksempel på typar prøvar kan vere CT, røntgen eller blodprøvar.

Etter at undersøkingane er ferdig, vil du enten bli utskriven eller innskriven til vidare behandling på sjukehuset. Du kan også bli sendt vidare til eit anna sjukehus.

Vi har god dialog med kirurgisk poliklinikk der vi behandlar lettare skader. Større ortopediske inngrep som hoftebrot blir sendt videre til Haugesund sjukehus eller Stord sjukehus for operasjon.

Sidan vi prioriterer pasientar som har fått alvorlege skader, eller som har vore ute for alvorlege ulykker, kan det bli lengre ventetid for dei med lettare skader. 

Vi tar imot sjuke barn. Dei blir stabilisert og sendt vidare til barneavdeling/intensivavdeling på Haugesund sjukehus, eller til Haukeland universitetssjukehus.

Vi handterer òg barn med kirurgiske problemstillingar som brot, eller barn som må overvakast i kortare periodar.

Akuttmottaket har beredskap for handtering av CBRNE-hendingar og handtering av handtering av pasientar som har vore utsett for farlege stoff som kan ha høg risiko for liv, helse og miljø.

På Odda sjukehus har vi eit saneringsrom der vi tar i mot CBRNE-pasientar, og tiltakskort for handtering av slike hendingar.

Vi handterer jamleg mindre kjemikaliehendingar òg har hyppige simuleringar der vi øver på slike hendingar.

CBRNE er ei forkorting av kjemiske (C), biologiske (B), radioaktive (R), nukleære (N) og eksplosive (E) hendingar. Brann i tunnel, kjemiske utslepp frå industri, transportulykke med utslepp av farlege stoff og smittsame sjukdommar er eksempel på CBRNE-hendingar.

Vi er 27 sjukepleiarar som jobbar 12 timars vakter. Mange av sjukepleiarane våre har spesialutdanning innan akuttsjukepleie, intensivsjukepleie, anestesisjukepleie og sårsjukepleie.

På Akuttmottaket har vi overlegar og legar under utdanning (LIS1).

Vi har parkering for besøkande i området rundt sjukehuset. Det er ingen parkeringsavgift.

Ventetida varierer avhengig av kor alvorleg skadd eller sjuk du er, ledig kapasitet og kor mykje folk det er på akuttmottaket.

Vi har serveringstilbod til alle våre pasientar og pårørande.

Pårørande og andre kan også kjøpe mat i kantina i underetasjen (U1). Den er open frå kl. 10.00 -12.30.

Du kan bruke nettverket gjest.ihelse.net.

Du vil få beskjed om å legge inn mobilnummeret ditt, deretter får du tilsendt eit brukarnamn og passord for å logge inn.

Viss du er på venterommet/daglegstova, kan du ta kontakt ein av dei tilsette som er på vakt. 

Viss du har blitt utskriven, kan du kontakte sentralbordet, avdelinga der du var innlagt på, eller fastlege.   

Om du ønskjer meir informasjon om helsehjelp, rettar, sjukdom eller diagnose kan du lese om dette på Sykdommer - Helsenorge