Bulkamidbehandling

Behandlinga går føre seg i poliklinikken. Du treng ikkje vere fastande. Du skal ta dei vanlege morgonmedisinane dine, men dersom du bruker blodfortynnande medisin som Marevan® eller tilsvarande, skal du som hovudregel ikkje ta tablettar dei siste 2 dagane før inngrepet. Ved tvil om dette, kontakt lege. Albyl E® eller tilsvarande kan du ta som vanleg.

Alle bør ta 800 mg Ibux® (2 tabl. á 400 mg) og 1 gram Paracet® (2 tabl. á 500 mg) éin–to timar før inngrepet. Begge preparata blir fått kjøp reseptfritt på apoteket eller i butikk.

Bulkamid er eit enkelt inngrep som blir gjort poliklinisk. 

Det blir sett lokalbedøvande gelé i urinrøyret og lokalbedøving i sprøyte i vevet på begge sider av urinrøyret. Gjennom eit uretraskop (lysrøyr som blir ført gjennom urinrøyret) kan legen sjå innsida av urinrøyret. Eit stoff blir sprøyta under veggen i urinrøyret og lagar små puter i vevet slik at urinrøyret blir trongare. Behandlinga tar 5–10 minutt. 

Gjer det vondt? 

Operasjonen blir vanlegvis utført med lokalbedøvande gel i urinrøyret og lokalbedøving i sprøyten rundt urinrøyret. Det siste er smertefullt, men varer berre nokre få sekund. Det er elles vanlegvis lite smerter og ubehag knytt til inngrepet. 

Behandlinga gir lite smerter og du kan vere oppe rett etter etter inngrepet. Det blir anbefalt at du et og drikk som normalt i etterkant slik at du får fylt urinblæra. 

Du kan prøve å late vatnet når du kjenner trong til det, og kan reise heim når du kan tisse utan problem. 

Om du ikkje klarer å late vatnet godt nok, blir urinen tappa med eit kateter. Dersom du ikkje klarer å late vatnet komplett i løpet av dagen er det nødvendig å overnatte på sjukehuset. Skulle du ikkje klare å late vatnet dagen etter inngrepet, vil du bli opplært i å tappe urinen sjølv med eit lite kateter. Normal vasslating kjem som oftast i gang av seg sjølv etter nokre dagar. 

For at geléklumpane skal få festa seg er det viktig at du 

• unngår å presse når du tissar dei første dagane
• ventar 2 veker med karbad
• ventar 4 veker med samleie, tampong og hard fysisk trening 

Effekt av behandling 

Effekten av behandlinga kjem vanlegvis raskt. Ved nokre sjukehus vil du bli oppringd av sjukepleiar etter cirka tre månader, eller du tar sjølv kontakt. Om du ikkje har tilfredsstillande effekt av lekkasjen etter eit par månader, kan vi vurdere behovet for ny behandling med påfyll av Bulkamid. 

Biverknader og komplikasjonar 

Det er heilt normalt med noko blod i urinen etter inngrepet. Opplever du smerter, kan du bruke paracetamol eller ibuprofen. 

Blærekatarr (urinvegsinfeksjon) kan førekomme etter eit slikt inngrep. Du får derfor ofte ein medisin som førebygger dette (Hiprex). Får du svie eller hyppig vasslating etter heimreise bør du ta med morgonurin på reint glas til din eigen lege. 

Sjukmelding 

Sjukmelding er som regel ikkje nødvendig, men eigenmelding kan nyttast ved behov.