Høyrselstest

Det er ein fordel om øyregangane blir kontrollerte for ørevoks i forkant av besøket. Om det ikkje er mogleg å sjå trommehinna vil det påverke testane.

Vanlegvis er det ein audiograf som utfører testane.

Audiografen undersøker først øyra dine med eit otoskop.

Høyrselstest med tonar (rentoneaudiogram)

Rentoneaudiogram er ein høyrselstest med ulike tonar. Her ønsker vi å finne det svakaste lydnivået du høyrer på. Lydane vil variere i både styrke og tone, såkalla frekvens.

Testen blir gjord med hovudtelefonar og ein beinleiar, som er ein bøyel på hovudet. Beinleiaren er sentral i å finne årsaka til høyrselstapet ditt.

Høyrselstest med ord (taleaudiometri)

Ved taleaudiometri får du høyre ord i ulike styrkenivå som du skal gjenta. På den måten finn vi høyreterskelen din for tale, og korleis du oppfattar tale.

Det kan også gjerast andre testar, som for eksempel ubehagnivå for sterke lydar. Det er også mogleg med objektive høyrselstestar der du ikkje treng å medverke, som tympanometri, som måler rørsle på trommehinna og trykte i mellomøyret.  

Høyrselstestane går vi gjennom saman med deg og vidare oppfølging blir avtalt saman med lege. Dei vanlegaste behandlingsmetodane er høyreapparat, medisinar eller kirurgi.