Kreft i tjukktarmen – operasjon

I forkant av operasjonen blir du innkalla til førebuingar på poliklinikken. Her får du snakke med lege/operatør og eventuelt stomisjukepleiar. Nokre pasientar skal også gjennomføre rektoskopi og/eller koloskopi eller andre undersøkingar. Rektoskopi er ei undersøking av endetarmen, og koloskopi undersøkjer heile tjukktarmen. Er dette aktuelt for deg, vil det stå meir om dette i innkallinga. Det er ein sjukepleiar til stades under undersøkinga. Det er også fleire sjukehus som tilbyr samtale med fysioterapeut og ernæringsfysiolog i forkant av operasjonen.

Stomi

Dersom operasjonen fører til at du får stomi, tilbyr nokre sjukehus samtale med stomisjukepleiar eller annan erfaren sjukepleiar. Du vil då få meir detaljert informasjon om mellom anna korleis ein stomi blir laga, korleis han fungerer, og korleis det kan vere å leve med han. Vi markerer kvar stomien skal plasserast på magen, når det gjeld klede og kroppsfasong.

Planlegging av tida etter operasjonen/når du kjem heim

Det kan ta tid å komme seg etter ein større operasjon og det er derfor lurt å tenkje gjennom kva behov og moglegheiter du har for å få hjelp når du kjem heim. Dersom det i løpet av sjukehusopphaldet blir behov for heimetenester eller rehabilitering, hjelper vi deg med å søkje om dette. Dersom du har heimetenester frå før, bør du gi beskjed om når du skal opererast.

Blodfortynnande medisin/faste medisinar

Om du bruker blodfortynnande medisinar får du informasjon om kva du skal gjere. For å førebyggje blodpropp får dei fleste pasientar ei blodfortynnande sprøyte i underhuda på magen kvelden før operasjonen. Dette held du fram med i 4 veker etter operasjonen. Anestesilegen informerer deg om kva medisinar du skal ta på operasjonsdagen.

Tarmtømming i forkant av operasjon

I nokre tilfelle skal du tømme tarmen før operasjonen. Dersom dette gjeld deg får du beskjed før operasjonen.

Ernæring

Kvelden før operasjonen, og same morgon, bør du nyte ein spesiell type næringsdrikk. Dette vil du få informasjon om i god tid før operasjonen.

Røyking og alkohol

Røyking og dagleg inntak av alkohol gir auka risiko for komplikasjonar etter operasjonen. Røyking kan mellom anna forseinke heling av såret. Dersom du røykjer, bør du vurdere å slutte eller kjøpe røykjeplaster for bruk i tida rundt operasjonen.

Sjukdom før operasjonen

Dersom du blir sjuk før operasjonen, ta kontakt med avdelinga du skal leggjast inn på. Dette gjeld også dersom du blir forkjøla, er tett i nasen eller brystet. Då kan det hende operasjonen din må utsetjast.

Du må rekne med ei liggjetid på sjukehuset i 3 - 7 dagar etter operasjonen.

På operasjonsavdelinga

På operasjonsdagen blir du trilla til operasjonsavdelinga. Her møter du operasjonssjukepleiar og anestesisjukepleiar som skal passe på deg under operasjonen. Dersom du blir operert med open operasjon får du eit epiduralkateter i ryggen. Det vil bli brukt til smertestillande under operasjonen og dei første dagane etter operasjonen. Vi legg også inn eit blærekateter som gjer at vi kan følgje med på urinproduksjonen. Anestesilegen vil gi deg narkose/bedøving under operasjonen.

Etter operasjonen blir du overvaka du på avdelinga for oppvaking. Deretter blir du overført til sengeposten.

Lindring av smerte og kvalme

Det er normalt å ha litt smerter etter ein operasjon, spesielt når du beveger deg. Du får smertestillande tablettar, og i nokre tilfelle smertestillande i epiduralkateter. For å få til god smertebehandling er det viktig at du gir oss tilbakemelding når du har smerter. Etter å ha blitt operert i tarmen kan du føle deg kvalm på grunn av låg aktivitet i tarmen i starten. Du vil bli tilbode medikament som stiller kvalmen, om dette skulle gjelde deg.

Fysisk aktivitet

Det er mogleg å vere fysisk aktiv kvar dag sjølv om du nyleg er operert, når du får god smertelindring. Å vere aktivitet er svært viktig for at du skal komme deg opp raskt etter operasjonen. Allereie operasjonsdagen skal du ut av senga og eventuelt sitje oppe. Pleiarar og fysioterapeut vil følgje deg opp så lenge du er innlagd på sjukehus.

• Når du er fysisk aktiv:
• Du pustar djupare og førebyggjer lungebetennelse.
• Matlyst og fordøying kjem raskare i gang.
• Såra gror betre fordi blodsirkulasjonen aukar.
• Rørsle stimulerer blodsirkulasjonen og førebyggjer blodpropp. 

Ernæring og munnhygiene

Å ete mat er viktig for å få i seg nok næring og bidreg også til god munnhygiene. Dersom du har gått ned i vekt på grunn av sjukdommen din, får du tilbod om å snakke med ein ernæringsfysiolog. Det er viktig med munnhygiene og tannpuss, fordi dette bidreg til å førebyggje tørre slimhinner og at det dannar seg sopp i munnen. Tyggjegummi stimulerer tarmaktiviteten, samtidig som det aukar spyttmengda i munnhòla.

Operasjonsdagen på sengepost

• I tillegg til intravenøs væske, blir du oppmoda til å drikke og ete lett kost etter operasjonen.
• Om ettermiddagen/kvelden på operasjonsdagen får du hjelp til å komme opp av senga. Fleire korte turar er bra! Det er viktig for å få kroppen i gang igjen etter operasjonen. Du vil få hjelp til både å stå, gå og sitje.

Dag 1

• Du kan ete etter ønske og bør drikke 1-2 liter godt i løpet av det første døgnet, gjerne næringsrike drikkar.
• Du får hjelp til å bevege deg av både sjukepleiar og fysioterapeut. Vi tilrår at du er ute av senga i til saman 3 timar, avhengig av kva operasjonsmetode som er brukt og korleis forma di er.
• Det vil bli teke blodprøver av deg.
• Dersom du har blærekateter, vil det bli fjerna 1-5 døgn etter operasjonen.
• Det varierer når tarmen byrjar å fungere, men dersom du et og er i aktivitet er det bra for tarmfunksjonen.

Dag 2 og 3

• Har du epiduralkateter fjernar vi det som regel 3-4 dagar etter operasjonen. Du må ha blærekateter så lenge du har epiduralkateter.
• Det er ikkje farleg å kjenne smerte i operasjonssåra, men dersom smertene hindrar deg i å vere aktiv, må du seie frå slik at du kan få meir smertestillande.
• Dersom du har operert tjukktarmen, oppmodar vi deg til å vera ute av senga i 6 timar fordelte på dag og kveld. Du bør sitje oppe og gå til matsalen/daglegstova når det er mat.
• Sjukepleiar og fysioterapeut vil hjelpe deg i mobilisering postoperativt.
• Dag 3 tek vi nye blodprøver.
• Du kan reise frå sjukehuset allereie andre dag etter operasjonen, men dei fleste blir liggjande lenger på sjukehuset. Ved kreft i endetarmen må du rekna med liggjetid på sjukehuset i 3 - 7 dagar etter operasjonen.

Stomisjukepleiar

Om du har fått stomi, vil postsjukepleiar tilpasse stomi-utstyret til deg og behova dine, og lære deg korleis du skal bruke utstyret.

Barn som pårørande

Dersom du har barn som pårørande vil kreftsjukepleiar hjelpe deg med korleis du kan informere dei under behandlinga. Det er ein kreftkoordinator i alle kommunar, som har tilbod til deg og dine pårørande. Ta gjerne kontakt med oss for hjelp til å koordinere tenesta, eller ta kontakt med kreftkoordinator i heimkommunen din.

Reise heim

Vanlegvis kan du dra heim 3 - 7 dagar etter operasjonen. Du blir skriven ut når smertestillande tablettar gir god smertelindring og du er i stand til å komme deg inn og ut av senga sjølv. Du må ete og drikke tilfredsstillande og du skal ha hatt luftavgang eller avføring. Dersom du har fått stomi (utlagd tarm), skal du vere trygg på å handtere denne før du reiser. Vi ordnar med blå resept på stomi-utstyr og bestiller dette hos bandasjist eller apotek, før du reiser heim. Operasjonssåret skal sjå fint ut. Før du reiser heim, skal du ha samtale med lege og sjukepleiar. Det er vanleg å vere sjukmeld i 2 - 6 veker, utover dette etter vidare avtale med fastlege.

Når du har kome heim

Når du kjem heim er det viktig at du aukar aktiviteten gradvis og prøver å leve så normalt som mogleg. Du kan bere inntil 6 kilo dei første 6 vekene etter operasjonen, deretter gradvis auke. Du bør unngå tunge løft og hard trening (til dømes situps) dei første åtte vekene. Fysisk aktivitet som å gå tur og næringsrik mat er bra for at såret skal gro, og for å kome tilbake til same funksjonsnivå som før operasjonen.

Klipsa i operasjonssåra skal du fjerne hos fastlegen din 12- 14 dagar etter operasjonen. Dersom du har strips på såra skal desse sitje på så lenge du får beskjed om det, eller til dei losnar av seg sjølve.

Kontroll

Det er vanleg å møte til kontroll på kirurgisk poliklinikk om lag 4 veker etter operasjonen. Der får du svar på prøvar tekne frå vev under operasjonen og informasjon om vidare opplegg for behandling dersom det er aktuelt. Dersom du har fått stomi, vil du få kontrolltime på kirurgisk poliklinikk hos stomi-sjukepleiar 3-4 veker etter du har reist heim, men tidlegare dersom det er behov for det. I nokre tilfelle er det grunnlag for å gi cellegift etter operasjon for kreft i tjukktarmen, for å førebyggje tilbakefall av kreftsjukdommen. Dersom dette er aktuelt for deg, får du vite det på første kontroll.