Nyre- og urinvegsstein, perkutan knusing

Før operasjonen vil ein sjukepleiar orientere deg om operasjonen. Vi tar urinprøve, blodprøve og EKG (hjarteprøve). Lege vil gjere journalopptak og undersøke deg. Ta med oppdatert medisinliste.

Hygiene

For å førebygge infeksjon er det viktig at du dusjar før operasjonen. Vask hender og føter godt. Det er viktig at navlen òg blir vaska. Menn må trekke forhuda tilbake. Du må ikkje ta på makeup/sminke eller ansiktskrem/bodylotion etter dusjen. Naglelakk må fjernast. Du skal ikkje ha på deg klokke, smykke, piercing eller giftering under operasjonen. Personalet barberer operasjonsområdet og ordnar med reint tøy.

Medisinar

Ikkje ta eigne medisinar denne morgonen. Anestesilegen bestemmer kva medisinar du skal ha og du får desse av sjukepleiar. Nokre pasientar får ei sprøyte i magen 6 timar etter operasjonen for å unngå blodpropp og nokre pasientar får også antibiotika før operasjonen.

Bruker du inhalasjonar, eventuelt augedropar/nasespray, tar du desse med.

Inngrepet blir gjort i narkose.

Når du er godt bedøvd, blir det først lag eit tynt kateter gjennom urinrøyret, via urinblæra opp til nyra. Vanlegvis blir du snudd på magen og det blir lagt eit lite snitt i sida for «kikkertinstrumentet». Via denne tilgangen blir nyresteinen/nyresteinane knust(e) og henta ut.

Operasjonstida er vanlegvis 2 timar. Nokre pasientar blir opererte mens dei ligg på ryggen.

Etter operasjonen blir eit dren (slange) lagt gjennom huda til nyrebekkenet i kanalen til kikkertinstrumentet. Innvendig blir det eventuelt lagt ein ureterstent som sikrar at urinen renn frå nyra og ned til blæra.

Etter operasjonen

Du blir liggande på oppvakningsavdelinga til observasjonane av deg er stabile, da blir du flytta tilbake til sengeposten. Du kan starte varsamt med litt drikke, og du får mat når du er svolten.

Kateteret blir vanlegvis fjerna dagen etter operasjonen, mens drenet gjennom huda til nyrebekkenet blir behalden nokre få dagar. Før drenet blir fjerna, blir passasjen testa gjennom urinleiaren mellom nyrebekken og urinblære ved at drenet blir stengt i periodar. Når drenet er avstengt og seinare når det blir fjerna, er det viktig at du er mest mogleg oppe.

Etter at du har reist heim

Sjukmelding er avhengig av arbeidssituasjonen din. Vanlegvis vil det vere eit behov for nokre få dagar etter utskriving. Du har mest sannsynleg ein stent liggande i urinleiaren etter operasjonen og urinen kan vere litt blodig den første tida. Dette er normalt, men vil minke etter kvart. Det er derfor viktig å drikke rikeleg (1–2 liter per dag) slik at du har god gjennomskylling i urinvegane.

Fjerning av stent

Dersom du fekk innlagt stent under operasjonen, får du time til å fjerne denne ved Urologisk poliklinikk nokre veker etter operasjonen. Dette blir gjort i lokalbedøving. Av og til blir det gjort ein røntgenkontroll på førehand.

Sårstell

Du vil ha eit lite sår i sida der nefrostomikateteret har stått. Dette er lukka med sting som kan fjernast hos fastlegen etter om lag 14 dagar.

Det er vanleg med lekkasje av urin den første tida etter at kateteret er fjerna. Det er viktig at bandasjen blir skifta når ho er gjennomtrekt av urin eller sårvæske. Dersom bandasjen er tørr, kan du ha ho på i 2-3 dagar etter utskriving. Ta deretter bandasjen av forsiktig. Ekstra bandasje får du kjøpt på apoteket.

Det er viktig at du observerer såret når du har kome heim. Du skal sjå etter teikn som raudheit, heving og pussdanning. Dette kan vere teikn på sårinfeksjon. Ta kontakt med fastlegen din dersom du opplever dette. 

Reoperasjon

Ved stor nyrestein, og stein inne i sidegangane i nyret, førekjem reststeinar som du får tilbod om behandling for. Dette kan både gjerast med same teknikk, eller med ytre steinknusing, ESWL (Extracorporeal shock wave lithotripsy).

Aktivitet

Det er inga avgrensing for vanleg fysisk aktivitet etter ein slik operasjon, men ta det gjerne med ro dersom stenten gir ubehag. Det blir tilrådd å avstå frå trening og annan hard fysisk aktivitet i om lag 14 dagar etter operasjonen.  

Biverknadar og komplikasjonar

• Kontakt legevakt eller sjukehuset om du får feber og/eller frysningar.
• Om du skulle oppleve ubehag, at urinen endrar lukt og/eller at du har svie i samband med vasslatinga, kan dette tyde på ein urinvegsinfeksjon. Du bør då ta med deg ei urinprøve og oppsøkje fastlegen din. I tillegg opplyser du om dette på etterkontrollen på sjukehuset.
• Det er normalt at det kan kome noko blod i urinen og at vasslatinga vil vere hyppigare den første tida etter operasjonen.
• Dersom du skulle få problem med å late vatnet, få smerter eller spreng i blæra, må du oppsøkje legevakta eller sjukehuset.
• Det er normalt med lokale smerter i sida der nefrostomikateteret har stått. Vanlege reseptfrie smertestillande medisinar som Paracetamol og Ibuprofen er ofte tilstrekkelege.
• Under operasjonen kan komplikasjon med hull i nyrebekkenet førekome. Dette gror vanlegvis av seg sjølv etter nokre dagar ved at ein beheld nefrostomikateteret for avlasting ei stund etter operasjonen.
• Bløding under operasjon kan òg førekome, og nokre gonger har ein behov for blodoverføring. Ved større eller vedvarande bløding etter operasjon, kan det vere aktuelt med ny operasjon eller intervensjon på røntgenavdelinga. Dette er sjeldan.
• Etter operasjonen får nokon problem med fordøyinga. Råd ved forstopping: Drikk sure mjølkeprodukt, et fiberrik kost og ver i aktivitet.