Vi tilrår at du alltid nyttar siste versjon av nettlesaren din.
Sekretorisk otitt
Operasjon av kronisk mellomøyrebetennelse (væske i mellomøyret)
Nokre barn kan etter øyrebetennelse eller forkjøling få opphoping av væske i mellomøyret. Dette blir kalla sekretorisk otitt og kan påverke høyrselen. Tilstanden går oftast over av seg sjølv, men dersom det held fram over tid er det aktuelt med operasjon.
Lufta i mellomøyret ditt må heile tida bli erstatta av ny luft. Mangel på luft kan gjere at du får betennelse i slimhinna.
Barnet må faste før operasjonen. Å faste vil seie at barnet ikkje kan ete eller drikke mjølk dei 6 siste timane før operasjonen. Barnet kan drikke klare væsker (vatn, saft, jus utan fruktkjøtt) inntil 2 timar før operasjon.
Barn som får morsmjølk/-erstatning kan få dette inntil 4 timar før operasjon.
Det er viktig at barnet møter nydusja/bada og i reine klede.
Dersom barnet bruker medisinar eller inhalasjonar, skal desse takast med til sjukehuset.
Kontaktlinser, smykke, ringar, øyredobbar, piercing eller naglelakk må fjernast før operasjonen.
Under
Operasjon av barn blir utført i narkose. Om vaksne pasientar treng innlegging av ventilasjonsrøyr blir dette som oftast utført poliklinisk i lokalbedøving.
Det blir lagt eit snitt i trommehinna med ein liten spiss kniv. Deretter blir væska sogen bort før ein plasserer eit lite plastrøyr i trommehinna.
Operasjonen tar berre nokre få minutt.
Etter
Operasjonen medfører sjeldan smerter. Ved behov kan paracetamol brukast.
Det er normalt at det kan komme litt blodig sekret frå øyret. Dette kan halde fram i opptil éi veke.
Barn med innlagt ventilasjonsrøyr skal unngå å stupe eller dykke under vatn.
Unngå badebassengvatn i øyra dei første 10 dagane etter operasjonen.
Barnet kan dusje og vaske håret tre dagar etter operasjonen.
Dersom barnet ditt er plaga med gjentatte infeksjonar i øyra, bør det bruke silikonproppar ved aktivitetar i vatn. Du kan kjøpe slike proppar på apoteket.
Vasslating
Sjekk at vasslatinga fungerer som normalt etter operasjonen. Ta kontakt med sjukehuset dersom barnet ikkje får tissa i løpet av kvelden.
Aktivitet
Barnet kan vere i normal aktivitet dagen etter operasjonen.
Kontroll
Barnet blir kalla inn til ein første kontroll ved ØNH-lege. Deretter blir barnet følgt opp til røyret har falle ut. Kor lenge eit røyr sit i trommehinna varierer, men blir vanlegvis fjerna kirurgisk om det ikkje har falle ut etter to år.
Ver merksam
Kontakt fastlege dersom:
barnet får symptom på infeksjon, som sekresjon frå øyret, aukande smerter og feber over 38,5.
det framleis kjem sekresjon frå øyret éi veke etter inngrepet.
Haugesund: ØNH-avdelinga og høyrselsentralen held til i 1. etasje ved Haugesund sjukehus. Bruk hovudinngangen og gå forbi resepsjonen og sjukehusapoteket. Du finn oss i enden av korridoren.
Stord: Høyrselsentralen ligg i 1. etasje i den kvite bygningen ved sida av hovudbygget til Stord sjukehus.
Odda: ØNH-poliklinikken ligg i 1. etasje på Odda sjukehus. Poliklinikken har eige venterom.
Ved tilpassing av høyreapparat, anbefaler vi at pasienten har med seg følge/pårørande.
