Otosklerose – nydanning av beinvekst i mellomøyret som påverkar øyrebeinkjeda

Etter undersøking av øyra og ulike høyrselstestar kan ein øyre-nase-hals-lege mest sannsynleg stille diagnose og de kan saman bli einige om kva behandling som er best for deg. Det finst to alternativ: Tilpassing av høyreapparat eller operasjon.

Eit høyreapparat kan vere til god hjelp dersom høyrselstapet ikkje er stort. Det endrar ikkje sjukdomsbiletet, men forbetrar lydoverføring og dermed betre høyrsel. Eit høyreapparat bør som oftast utprøvast før kirurgi, og dersom dette er til nytte vil ein til vanleg ikkje anbefale kirurgi.

Operasjon

I forkant av inngrepet må det avklarast om du har andre sjukdommar eller om du bruker medisinar som kan ha noko å seie for operasjonen eller narkosen. Dersom du bruker blodfortynnande medisinar, må det avklarast med fastlegen din om du kan slutte med desse før operasjonen.

Du blir innkalla til ei forundersøking før operasjonen. Her møter du ein lege som undersøkjer deg, informerer deg om operasjonen og om moglege komplikasjonar og dessutan forholdsreglar før og etter operasjonen.

Dersom du bruker faste medisinar skal desse ikkje takast om morgonen operasjonsdagen, men bli tekne med til sjukehuset saman med ei oppdatert liste over medisinane du bruker. Anestesilege ordinerer kva for nokre av dei faste medisinane dine du kan ta før operasjonen. Du kan likevel bruke eventuell inhalasjonsmedisin som vanleg og ta denne med til sjukehuset.

Operasjonen skjer i narkose under mikroskop. Ein opererer gjennom øyregangopninga med eitt lite snitt i øvre del av øyregangen. Trommehinna blir løfta opp for å få tilgang til mellomøyret. Delar av stigbøyelen blir fjerna og erstatta med ein protese.

Det finst ulike typar protesar. Som regel består desse av teflon/platina, titan eller eit anna materiale som mellomøyret toler godt. Dei er i storleiksorden 0,6 x 4,5 mm. Ingen av protesane er til hinder for å gå gjennom ei MR-undersøking.

Etter protesen er operert inn, blir trommehinna lagd tilbake og det blir plassert ein tampong i øyregangen, som kan fjernast etter 1–3 veker.

Du kan dusje frå dagen etter operasjonen, men må unngå å få vatn på operasjonsområdet.

Vanlegvis blir ein sjukmeld i 2 veker. Det er viktig at du tek det med ro dei første dagane etter operasjonen, med gradvis auke av aktivitet. Etter 4 veker kan du ta opp att eventuell trening. Dei første 14 dagane etter operasjonen bør du unngå trykkauke i øyret, som for eksempel å snyte deg kraftig, løfte tungt eller bøye deg til golvet.

8 av 10 pasientar som går gjennom ein operasjon, får så god høyrsel at dei kan delta i ein normal samtale utan bruk av høyreapparat. Høyrselsgevinsten er som regel varig. I sjeldne tilfelle kan det skje at protesen losnar eller andre forandringar som kan gjere ein ny operasjon nødvendig.

Lett svimmelheit kan finnast dei første dagane etter operasjonen.

I sjeldne tilfelle kan det oppstå komplikasjonar. Ein kan få øreinfeksjonar eller skade på smaksnerven som ligg i mellomøyre. Derfor blir berre eitt øyre operert om gongen. Omtrent 1 prosent av pasientane blir plaga med langvarig svimmelheit etter inngrepet og cirka 0,5–1 prosent får redusert høyrsel på det opererte øyra.

Nokre pasientar har tinnitus i samband med otosklerosesykdommen. Korleis den utviklar seg etter operasjonen er ikkje mogleg å seie på førehand. Ofte blir den betre, men i sjeldne tilfelle kan ein oppleve tiltakande plager.