Perkutan endoskopisk gastrostomi (PEG)
Gastrostomi er ein kanal frå magesekken til hudoverflata, der det er ført ein sonde gjennom kanalen. Vanlegvis blir inngrepet gjort ved hjelp av eit gastroskop, og metoden blir kalla Perkutan Endoskopisk Gastrostomi (PEG). Sonden som blir brukt blir kalla gastrostomisonde.
Årsak
Personar som av ulike årsaker har langvarige eteproblem, kan ha nytte av ein gastrostomisonde for å få tilført tilstrekkeleg næring. Det kan vere behov for gastrostomi i ein kort periode eller i eit meir langsiktig perspektiv.
Før
Korleis kan eg førebu meg?
Du må møte fastande, magesekken må vere heilt tom før undersøkinga.
- Ikkje ete eller drikke noko dei siste 8 timane før undersøkinga.
- Dersom du er veldig tørst, kan du drikke 1 – 2 glas vatn inntil 2 timar før undersøkinga. Etter dette kan du skylje munnen utan å svelgje noko.
Blodfortynnande medisinar
Brukar du blodfortynnande medisinar er det risiko for at det kan oppstå større blødingar enn normalt. Derfor er det ønskjeleg at du mellombels sluttar med blodfortynnande medisinar. Les innkallingsbrevet nøye for å sjå kva for nokre blodfortynnande medisinar du må slutte med, og kor lang tid før undersøkinga du må gjere dette.
Andre medisinar
- Dersom du har diabetes og bruker insulin, eller tek livsviktige medisinar som ikkje kan utsetjast, kan du kontakte oss for å få timeavtale tidleg på dagen.
- Gi oss beskjed dersom du er allergisk for nokre legemiddel.
- Vi ønskjer at du tek med deg ei oppdatert liste over medisinar du brukar.
- Du vil få antibiotika før PEG blir laga til, for å førebyggje eventuell infeksjon etter anlegginga.
Under
Kva skjer under undersøkinga?
Under sjølve undersøkinga ligg du på venstre side. Har du tannprotesar må desse takast ut. Du får eit munnstykke mellom tennene. Når gastroskopet kjem bak tunga, får du beskjed om å svelgje. Sjølv om dette kan opplevast ubehageleg så forsøk å slappe av og puste roleg medan legen undersøkjer deg. Etter kvart vil du få beskjed om å liggje på ryggen. Legen vil då finne ut kvar på magen gastrostomien skal plasserast, og gi bedøving før vi lagar samband mellom hud og magesekk.
Du kan puste normalt igjennom munn og nase under undersøkinga.
Det finst ulike typar gastrostomisonder og ved innlegging blir det vurdert kva type du skal ha.
Gjer det vondt?
Det kan opplevast noko ubehageleg. Men du vil på førehand få tilbod om ei roande og smertestillande sprøyte.
Kor lenge varer behandlinga/undersøkinga?
Sjølve undersøkinga tek vanlegvis mellom 30 og 45 minutt.
Etter
Skal eg til kontroll eller følgjast opp på nokon måte?
Det er ikkje planlagt nokon kontroll i etterkant. Gastrostomisonden kan liggje så lenge han fungerer og så lenge du har behov for han.
Ver merksam
Komplikasjonar rett etter innlegging er sjeldan. I heilt spesielle tilfelle kan det oppstå bløding, infeksjonar og skadar på andre organ. Ved mistanke om komplikasjonar er det aktuelt med vidare observasjonar på sjukehuset.
Den første tida etter undersøkinga kan du kjenne deg litt oppblåst og ha smerter der gastrostomien er lagd inn, men dette går over etter eit par veker.
Kontakt
Haugesund sjukehus
Gastromedisinsk poliklinikk
Oppmøtestad
Du finn oss i 1. etasje på Haugesund sjukehus. Gå til ventesone 7 når du har registrert deg.
Sjå informasjon om sjølvbetjent innsjekk nedafor.
Haugesund sjukehus
Karmsundgata 120, 5528 Haugesund