Vankomycinresistente enterokokkar (VRE)

VRE skilst ut i avføring og kan finnast på huda og hendene, og nokre gonger i spytt eller urin. Bakteriane kan også finnast i omgivnadene rundt ein person som er smitta, til dømes på nattbord, sengetøy, dørhandtak og inventar på baderommet. Derfrå kan dei overførast til dei som tek på dette.

Smitten blir vanlegvis overført via hendene til munnen. God handhygiene er det viktigaste tiltaket for å unngå smitte.

VRE er sjeldan i Noreg, men vanlegare i mange andre land, og innlegging på sjukehus i utlandet gir større risiko for å bli smitta.

Kva kan VRE føre til?

VRE lever som regel fredeleg i tarmen utan at ein sjølv blir sjuk. Denne tilstanden kallar ein «VRE‐berarskap» eller «kolonisering». Bakterien kan forsvinne av seg sjølv, men det kan ta mange månader og i enkelte tilfelle år.

Dersom bakterien forårsakar ein infeksjon, fører den oftast til urinvegsinfeksjon, men andre infeksjonar kan også finnast.

Kven er mest utsett for å bli sjuke av VRE?

Personar med alvorleg sjukdom og nedsett immunforsvar (til dømes kreft) er mest utsette for å bli sjuke av VRE. Derfor er det spesielt viktig å hindre smitte i sjukehus.  

Sjølv om mange antibiotika ikkje verkar, vil det som regel vere mogleg å behandle infeksjonar med VRE. Det finst inga effektiv behandling som fjernar bakteriane frå tarmen (berarskap).

Kva tiltak er nødvendige?

Handvask eller spriting av hendene er det viktigaste tiltaket for å hindre spreiing av VRE. 
 
Ved innlegging i sjukehus vil du vanlegvis få einerom og eige toalett. Helsepersonalet og besøkande bruker som regel verneutstyr som smittefrakk og hanskar, eventuelt også munnbind og briller. Skittentøy blir samla i ein eigen gul sekk på rommet. 

Vanlegvis må du opphalde deg på rommet under heile sjukehusopphaldet. I nokre tilfelle er det mogleg å gå ut av rommet etter nærare avtale med personalet. 

Kan du få besøk?

Ja, men det må takast forholdsreglar for å unngå at besøkande blir smitta eller spreier smitte til andre:

• Besøkande skal kontakte personalet før dei går inn i pasientrommet. Dei skal bruke verneutstyr i form av smittefrakk og hanskar, og skal ikkje sette seg i pasientsenga. NB: Besøkande som til vanleg bor i same husstand som pasienten treng i nokre tilfelle ikkje å bruke verneutstyr. Ta kontakt med personalet.
• Besøkande skal ikkje bruke personlege eigedelar (til dømes mobiltelefonar) i pasientrommet.
• Besøkande skal ikkje ete eller drikke under besøket, heller ikkje mat eller drikke som er medteken. Dei skal ikkje forsyne seg med mat/drikke på sengeposten eller nytte kafeteria, kantine eller kiosk på sjukehuset.
• Besøkande skal ikkje bruke toalettet som høyrer til pasientrommet (unntak i nokre tilfelle). Kontakt personalet ved behov for toalettbesøk.
• Det er viktig at alle besøkande vaskar eller spritar hendene grundig når dei går ut av rommet.
• Besøkjande skal unngå å besøkje andre pasientar.

Sjukehuspersonalet vil informere ytterlegare om kva forholdsreglar som gjeld for pårørande som skal opphalde seg lenge på sjukehuset.

Når du har komme heim, kan du leve som normalt, men det er likevel nokre få ting du bør gjere:

• Vask hendene ofte, spesielt etter toalettbesøk, før matlaging og måltid. Det same gjeld for alle personar i husstanden din.
• Bruk eigne handkle og vaskeklutar.
• Vask undertøy, handkle og sengetøy på minst 60°C, og ikkje saman med tøy frå andre personar.
• Opplys om VRE ved alle kontaktar med helsevesenet. Det same gjeld for husstandsmedlemmer.

Har du spørsmål, kan du få informasjon av den behandlande legen din eller sjukepleiar.