Rekrutterings- og samhandlingstilskot

Søknadsskjema

Gå til søknadsskjema

Kontakt

Spørsmål kan rettast til arbeidsutvalet (AU) for Strategisk samarbeidsutval (SSU), ved interkommunal samhandlingssjef Marianne Wennersberg, eller samhandlingseininga i Helse Fonna, samhandling@helse-fonna.no.

Søknadskriterier for rekrutterings- og samhandlingstilskot

Føremål

Tilskotet skal understøtte forpliktande samarbeid mellom kommunar og helseføretak om tenesteutvikling og gode pasientforløp.  Føremålet med rekrutterings- og samhandlings-tilskotet er å legge til rette for samanhengande tenester, eit godt desentralisert helsetilbod med god kvalitet og rett arbeidsdeling.

Rekrutterings- og samhandlingstilskotet skal fremje innovasjon og nytenking, og bidra til å prøve ut tiltak og prosjekt som har potensiale til å løysa samhandlingsutfordringar.

Alle aktørarar i Helsefellesskapet i Helse Fonna kan søke om tilskot. Det er eit krav at alle søknader skal vere til prosjekt/tiltak som kommune og føretak er samde om.

Nasjonale føringar

Nasjonal helse- og sjukehusplan 2024-2027 og oppdragsdokumentet til dei regionale helseføretaka etter revidert nasjonalbudsjett 2024 gir nokre generelle føringar for tildeling av tilskot:

Rekrutterings- og samhandlingstilskotet skal understøtte tenesteutvikling og gode pasientforløp gjennom å styrke samhandlinga.

Særleg prioritert er:

• tiltak og område som kan få ned ventetid i sjukehus
• digitale tenester og digitale samhandlingsløysingar
• Prioriterte pasientgrupper er
• pasientar med alvorlege psykiske lidingar og rusproblem
• skrøpelege eldre
• barn og unge
• personar med fleire kroniske lidingar
• samt
• tenester innan svangerskap, fødsel og barselomsorg
• integrert psykisk helse- og rusteneste
• rehabilitering
• tiltak for å redusera tal utskrivingsklare pasientar som blir liggande på sjukehus

Beløpet som vert motteke i tilskot vil som hovudregel vere ei delfinansiering som supplerer partane sin eigen ressursinnsats.

Det skal vere likeverd mellom kommunar og føretak i utarbeiding av forslag til korleis midlane skal nyttast.

Midlane skal brukast etter semje melom helseføretak og aktuelle kommunar. Partane skal gjennom avtale gjera tydeleg korleis tiltaket støttar opp om føremålet med tilskotsordninga, og kva som er gevinsten med tiltaket.

Tilskotet kan understøtte tiltak som fremjar rekruttering og god bruk av personell i helseregionen på tvers av nivå, til dømes utprøving og etablering av kombinerte stillingar.

Lokale føringar

Tildeling og bruk av rekrutterings- og samhandlingsmidlar skal vere i samsvar med strategi og overordna handlingsplan for Helsefellesskapet i Helse Fonna.

Satsingsområda i strategien for helsefellesskapet er:

• Samanhengande tenester
• Helseberedskap
• Rekruttere og halde på personell
• Digitalisering av tenester
• Ei helse- og omsorgsteneste som fremmer førebygging, meistring, habilitering og rehabilitering
• Brukarmedverknad
• Vidareutvikle helsefellesskapet, jamfør strategi

Kriterier for tildeling av tilskot

Søknaden må innehalda informasjon om søkarane sin eigen ressursinnsats, for eksempel i form av personell, økonomiske midlar, innkjøp og utstyr.

Søknaden vil bli vurdert etter:

• Samsvar med helsefellesskapet sin strategi og overordna handlingsplan.
• Potensiell nytte- og overføringsverdi.
• Potensiale for å løysa konkrete samhandlingsutfordringar der pasientar står i fare for å falle mellom kommune og sjukehus. Til dømes tilfelle der tiltak ikkje blir gjennomførte fordi kostnad og gevinst ikkje kjem på same nivå.
• Om prosjektet/tiltaket kan bidra til berekraftige tenester, for eksempel tiltak som reduserer behovet for personalressursar eller bidreg til anna god ressursutnytting av kompetanse, desentraliserte helsetenester, kutt i reiseveg, rekrutterer og beheld personell.

Søknader om midlar til tiltak som inngår i ordinær drift hos ein av partane vert ikkje prioritert.

Det skal vera brukarmedverknad i prosjekt knytt til tenesteutvikling og kvalitetsforbetring i helse- og omsorgstenestene.

Søkarane vert råda til å også prøva ut finansiering gjennom andre støtteordningar.

Søknadsprosess og søknadsfrist

Aktørar i Helsefellesskapet i Helse Fonna kan søke om tilskot. Det er eit krav at alle søknader må bygge på semje mellom kommune(ar) og føretak.  

Søknadfrist er 10. oktober 2025.

Prosjekt/tiltak som får innvilga tilskot vil bli omtalt på helsefellesskapet sine nettsider. Alle aktørarar i helsefellesskapet kan sende søknad, men alle søknader må bygge på dokumentert semje mellom kommune/kommunar og føretak.

Søknadsprosessen skal evaluerast før utgangen av 2025 for å sjå om det er behov for endringar i kriterier eller modell.

Organisering av prosjekt

I søknadsskjema må det leggast inn informasjon om korleis prosjektet skal organiserast; styringsgruppe, eventuell referansegruppe og prosjektleiar/prosjektteam.

Behandling av søknader

Strategisk samarbeidsutval (SSU) vurderer og gjer vedtak om kva prosjekt/tiltak som skal få støtte. SSU skal og godkjenne forslag til representasjon i styringsgruppe for prosjektet. Aktuelle faglege samarbeidsutval (FSU) vil få høve til å gi uttale til prosjektsøknader som er knytt til deira felt.

Søknadsskjema

Helsefellesskapet sitt søknadsskjema skal nyttast. Søknadane skal vere kortfatta, men må innehalde tilstrekkeleg informasjon til å bli vurdert.

Søknader som ikkje oppfyller desse krava, kan bli avviste. Arbeidsutvalet for SSU kan be om tilleggsinformasjon før det blir gjort vedtak i SSU om tildeling.

Utbetaling av tilskot

Tilskot som er innvilga blir utbetalt på følgande måte:

Dersom hovudsøkar er ei eining i Helse Fonna, skal utgifter knytt til tildelt tilskot kostnadsførast på prosjektnummer R-11326.

Dersom hovudsøkar er kommune, vert tilskot utbetalt etter faktura merka prosjektnummer R-11326.

Bruk av tilskot

Rekrutterings- og samhandlingstilskotet må brukast i samsvar med søknaden, og tilskotet gjeld innvilga periode. Eventuell omdisponering av midlar må godkjennast av SSU.

Heile eller delar av tilskotet skal betalast tilbake dersom midlane ikkje blir brukt i tråd med søknaden.

Sluttrapportering

Når prosjekt-/tiltaksperioden er over, skal ansvarleg søkar sende sluttrapport til SSU ved hjelp av helsefellesskapet sitt rapporteringsskjema.

I sluttrapporten skal mottakar av tilskotet vurdere effekt og læringspunkt av tiltaket, slik at erfaringane kjem til nytte for andre.

Samhandlingstilskotet krev ikkje eigen revisjon. Det betyr at midlane vil inngå i ordinær revisjon i organisasjonen som får tildelt midlar.

Strategi for Helsefellesskapet i Helse Fonna 2025-2027

Helsefellesskapet i Helse Fonna - Helse Fonna HF

Tildeling av rekrutterings- og samhandlingstilskot 2025

Helsefellesskapet i Helse Fonna fekk 10 søknader innan fristen 1. august 2025.

Strategisk samarbeidsutval (SSU) behandla søknadene i møte 26. august 2025. Då vedtok dei kven som får tilskot i 2025.

Prosjekt og tildelingar i 2025

Berekraftige pasientforløp – Styrket samhandling og helhetlig omsorg i Tysvær kommune

Søkar: Tysvær kommune og ortopedisk avdeling, Haugesund sjukehus              

Tildelt beløp: kr. 50.000

«Min jordmor» i Helse Fonna

Søkar: Føde/barsel, Haugesund sjukehus

Tildelt beløp: kr. 100.000

Trinnvise intervensjonsprogram på tvers av kommune og spesialisthelseteneste for dei vanlegaste psykiske helseplagene blant barn og unge    

Søkar: BUP Helse Fonna og Tysvær, Sauda, Bømlo, Kvinnherad og Stord kommunar         

Tildelt beløp: kr. 1.200.000

Digital samhandling og smartare koordinering for pasientar med fleire kroniske lidingar             

Søkar: Sveio kommune og Helse Fonna/ AU for FSU personar med fleire kroniske lidingar        

Tildelt beløp: kr. 50.000

Pasientreisa – frå spesialisthelseteneste til mottak og oppfølging i kommunen     

Søkar: Kvinnherad kommune og Stord sjukehus 

Tildelt beløp: kr. 50.000

Bra mat for betre helse for personar med kognitiv funksjonsnedsetting

Søkar: Haugesund og Bokn kommune og poliklinikk lære-vanskar og utviklings-forstyrringar  

Tildelt beløp: kr. 900.000

Heilheitleg ivaretaking av mor, partner og barn med alvorleg psykisk sjukdom i perinital-perioden    

Søkar: Familieambulatoriet Helse Fonna og Sveio kommune              

Tildelt beløp: kr. 450.000

Tidleg utskriving, intensiv språktrening for hjerneslags- pasientar i subakutt fase

Søkar: Sunnhordlandskommunar og Avdeling for rehabilitering, Helse Fonna 

Tildelt beløp: kr. 50.000

Tidleg utskriving, intensiv språktrening for hjerneslags-pasientar i subakutt fase     

Søkar: Bømlo, Stord og Kvinnherad kommune og Stord sjukehus          

Tildelt beløp: kr. 50.000

Tidleg identifisering av skrøpelege eldre   

Søkar: Bømlo, Stord og Kvinnherad kommune og Stord sjukehus     

Tildelt beløp: kr. 400.000