Vi tilrår at du alltid nyttar siste versjon av nettlesaren din.
Bekkenbotnstrening
Trening av bekkenbotnen er effektiv førebygging/behandling av urinlekkasje hos vaksne kvinner. Denne treninga har også effekt ved symptom på ufrivillig lekkasje av luft/avføring, prolaps av bekkenorgan og ved smerter.
Du bør trene bekkenbotnsmusklane mens du er gravid, sjølv om du ikkje er plaga med urinlekkasje. Det er vist at intensiv styrketrening av musklane i bekkenbotnen effektivt førebygger/behandlar urinlekkasje både under og etter svangerskapet.
Det ser dessutan ut til at trent muskulatur i bekkenbotnen ein fordel under sjølve fødselen og at kvinner lettare finn igjen musklane etter fødselen. Du kan følge treningsprogrammet som er forklart her, både mens du er gravid og etter fødselen.
Før
Trening av bekkenbotnen krev ingen førebuingar.
Under
Prøv å få kontakt med musklane i bekkenbotnen
Dette kan ta kortare eller lengre tid. Musklane er lokaliserte rundt urinrøyret/skjeden/endetarmen, innvendig i bekkenet. Trekk saman rundt opninga, prøv å løfte opp og inn i kroppen, og slepp ut igjen utan å trykke aktivt nedover.
Sjekk om du får tak i dei rette musklane
Hald ei hand under skjeden/endetarmen utanpå trusa og tenk at du løftar opp og vekk frå handa. Prøv å stoppe drypinga på slutten av vasslatinga. NB! Ikkje gjer dette som regelmessig trening.
Vel ei utgangsstilling
Det er individuelt kva som passar best.
Dei vanlegaste feila når du trenar
Bruk av sete, lår eller magemusklar (tipping av bekkenet) i staden for i musklane i bekkenbotnen; kraftig innpust eller overdriven hald av pusten i staden for samantrekking av bekkenbotnsmusklane; trykking nedover i staden for å løfte opp og inn (noko som kan forverre eventuelle symptom på lekkasje).
Konsentrer deg
Ikkje forsøk å trene samtidig som du gjer andre ting, da yter du ikkje maksimalt. Det er også raskare å trene feil, og treninga blir ikkje så effektiv. Gjer fleire lette samantrekkingar etter kvarandre.
Doseringa til treninga
Klarer du 8–12 repetisjonar x 3 rundar dagleg, så er det bra! Dei tre rundane kan du gjere på eit tidspunkt på dagen med berre ein liten pause mellom kvar runde, eller du kan fordele dei tre rundane utover dagen slik det passar deg.
Intensiv bekkenbotnstrening
Når du begynner å få kontakt med bekkenbotnsmusklane, kan du intensivere treninga. Trekk saman så hardt du kan, og forsøk å halde kvar samantrekking lenger og lenger.
NB! Dersom du kjenner eit inntrekk av den tverrgåande magemuskelen (heilt nedst i magen), så er det ok. Det kjem av eit naturleg samspel med bekkenbotnsmusklane.
Når du klarer å halde kvar muskelsamantrekking i 6–8 sekund, kan du legge til 3–4 raske samantrekkingar vidare innover på slutten av haldeperioden.
Oppsummering av intensivt treningsprogram
1 For kvar repetisjon
Trekk saman bekkenbotnsmusklane, hald 6–8 sekund, gjer 3–4 raske løft, slepp ut igjen og ta 3–4 sekunds pause.
2 Dagleg treningsdose
8–12 repetisjonar x 3 runder.
Treningseffekt?
Du bør prøve intensiv bekkenbotnstrening i minst 6 månader. Er du symptomfri, kan du gå over til vedlikehaldstrening. Dersom du ikkje er symptomfri, men stadig opplever betring, bør du halde fram med intensiv trening heilt til du er fornøgd, og deretter gå over til vedlikehaldstrening.
Dersom du ikkje opplever symptombetring, finst det andre tiltak du kan prøve – kontakt primærlegen din.
Vedlikehaldstrening
Det er individuelt kor mykje som skal til for å halde muskelstyrke ved like og førebygge lekkasje. Det er anbefalt å gjere 8–12 samantrekkingar så hardt som mogleg 1–2 gonger per veke. Hugs at trening er ferskvare – du mistar treningseffekten du har bygd opp, dersom du tar lengre pausar frå treninga.
Etter
Oppfølging hos fysioterapeut
Dersom du har symptom på urinlekkasje, ufrivillig lekkasje av luft/avføring, prolaps av bekkenorgan, smerter, eller dersom du er usikker på om du trener rett / har kontakt med bekkenbotnsmusklane, kan du be legen din om ein rekvisisjon til fysioterapeut.
Ei oversikt over fysioterapeutane som jobbar med kvinnehelse finn du på fysio.no. Klikk deg inn på «faggrupper» og deretter «faggruppe i kvinnehelse».
Du finn Urologisk poliklinikk i 1. etasje på Haugesund sjukehus. Vi er samlokalisert med kirurgisk poliklinikk. Ta kontakt med ekspedisjonen vår når du kjem.
Meld at du er komen via SMS-en du har fått, eller på automaten ved hovudinngangen til sjukehuset.
Du får dekka deler av utgiftene dine ved behandling hos lege, på poliklinikk eller andre behandlingsinstitusjonar, men du må betale ein eigendel. Frikort for helsetenester får du når du har betalt over eit visst beløp i eigendelar. Det er ulike eigendelar avhengig av helseteneste.
Du får frikort for helsetenester når du har betalt over eit visst beløp i eigendeler. Når du viser frikort, slepp du å betale eigendelar for resten av kalenderåret.
Du kan endre timen din inntil 48 timar før oppmøte. Dette kan du gjere på helsenorge.no eller ved å kontakte oss på telefon 52 73 90 00. Kontaktsenteret vårt er opent kl. 07.30 – 15.30.
På helsenorge.no finner du informasjon om timen din i innkallingsbrevet.
Mange pasientar og pårørande ønskjer å ta bilete eller video som eit minne frå tida på sjukehuset. Dette er sjølvsagt heilt greit, så lenge det er pasienten eller pårørande og vener det blir teke bilete av.
Det er ikkje lov å ta bilete av medpasientar eller tilsett ved sjukehusa. Vi har hatt fleire saker der bilete av medpasientar og tilsette har blitt publiserte på sosiale medium utan at dei har gjeve løyve om det.
Vi håpar at du syner respekt for personvernet til alle du møter under opphaldet ved sjukehuset, og at du bare tar bilete av eigen familie og vener.
Kantina i 6.etasje er open for pasientar, besøkande og tilsette.
Opningstider kantine
Måndag - fredag kl. 09.30-15.30. Stengt i helger og på heilagdagar.
Pasientkantine i 4 og 5.etasje er kun open for pasientar.
Fleire av sengepostane har eigne spiserom med enkel sjølvbetening for inneliggande pasientar. Ta kontakt med avdelinga du høyrer til.
Ta med den faste medisinen du brukar. Det kan ta tid å få same medisin frå apoteket.
Dessverre kan tjuveri finne stad på sjukehuset. La verdisaker vere igjen heime.
Ta med behagelege klede og gode innesko som er stødige og lette å ta på. Av hygieniske grunnar er det ikkje tillate å gå barbeint på sjukehuset.
Ta med toalettsaker som tannbørste, tannkrem, kam, deodorant og eventuelt barbermaskin. Hugs også hjelpemiddel du er avhengig av: til dømes stokk, krykker, rullator og rullestol.
God hygiene er ein viktig faktor for å kunne gi god behandling til pasientane.
Vi har ein tappestasjon i Sauda. Kontakt oss på telefon: 52 73 22 81.
Parkeringshuset nord for sjukehuset er reservert pasientar og besøkande. Alle må betale for parkering. Dette gjer du på p-automatane enten med kort eller kontantar. I tillegg kan du benytte EasyPark appen.
Parkeringshuset har tre ladeuttak.
Reserverte parkeringsplassar
Reserverte plassar for HC-parkering er utanfor hovudinngangen. Hugs å legge parkeringsbeviset godt synleg i frontruta.
Det er reserverte plassar for blodgivarar og dialysepasientar i toppetasjen på parkeringshuset. Du vil få utlevert parkeringsbevis frå avdelinga dersom du har rett til å bruke dessa plassane.
Parkeringsavgift
Det er Haugesund Parkering Drift as som har oppfølging av parkeringshuset og parkeringane foran hovudinngangen. Eventuelle klager på p-avgift meldast til dei. Dette finn du også informasjon om på p-automatane.
Pris for å parkere på sjukehus i Helse Fonna er 25 kroner i timen. Makspris for eit døgn er 155 kroner.
