Diagnose
Skulderlidingar
Det er mange ulike årsaker til skuldersmerter. Dei vanlegaste diagnosane er inneklemming eller andre problem med skuldersenene, frosen skulder eller muskelsmerter. Det finst fleire behandlingsmoglegheiter, som til dømes fysioterapi, eigentrening, legemiddel og nokre gonger operasjon.
Utgreiing
Du bli grundig undersøkt av lege ved første polikliniske konsultasjon. I løpet av denne undersøkinga vil rørsle i nakke og skuldrer, testing av muskelstyrke og diverse spesifikke testar bli utførte. Ofte vil dette vere tilstrekkeleg for å stille ein diagnose.
Ved behov blir det gjord ei tverrfagleg vurdering saman med fysioterapeut. I nokre tilfelle vil vi gjere supplerande undersøkingar som ultralyd, røntgen eller MR.
Behandling
Dei fleste skulderplagene skal behandlast med informasjon, råd og øvingar. Du vil få informasjon om tilstanden, forventa forløp og kva du kan gjere sjølv.
Tilrettelegging av arbeid kan vere aktuelt ein periode. Dei fleste pasientar vil ha behov for fysioterapi, og då er det rettleidd trening som er den best dokumenterte behandlinga. Rettleidd trening går ut på å korrigere haldnings- og rørslemønster og gi øvingar med gradvis progresjon.
Ved mykje smerter kan smertebehandling med medisinar vere aktuelt ein kort periode. Ved «frosen skulder» kan mange få tilbod om kortisoninjeksjon som er ei godt dokumentert behandling. Ved denne tilstanden er ein tilbakehalden med fysioterapi på grunn av sterke smerter.
Når behandling ikkje gir forventa betring av smerte og funksjon kan vurdering av kirurg vere aktuelt.
Oppfølging
Dei fleste pasientane blir betre med behandling i frå 6 veker til 12 veker og blir vanlegvis følgde opp i primærhelsetenesta. Ved usikker diagnose eller ved komplekse tilstandar der skuldersmertene er ein del av eit større bilete kan det vere aktuelt med oppfølging i spesialisthelsetenesta inntil diagnosen og den best eigna behandlinga er avklart.
