Afasi er språkvanskar som kan oppstå etter sjukdom eller skade i hjernen.
Hjernen har to hovudområde for språkfunksjon, eit fremre og eit bakre, som oftast på venstre side. Dersom eitt eller begge av desse språkområda blir skadde, kan ein miste tilgang til språket, eller ikkje ha like rask tilgang som ein hadde tidlegare.
Afasi kan gjere det vanskeleg å uttrykkje seg munnleg og skriftleg. Det kan vere vanskeleg å forstå kva andre seier, og det ein les.
Oftast kjem afasi av hjerneslag (blodpropp eller bløding i hjernen), men det kan også komme etter hovudskadar, hjernesvulst eller andre sjukdommar.
Ein logoped har ulike testar og undersøkingar som kan finne ut om ein har afasi, i tillegg til ei heilskapleg vurdering av kommunikasjonsevna.
Behandlinga består av eit tilpassa undervisningsopplegg. Det vil mellom anna bestå av ulike oppgåver der du skal bruke språket (både snakke, skrive, lese og forstå tale). Du og dine pårørande vil også få råd om korleis de best kan kommunisere.
Afasi artar seg ulikt frå person til person. Somme har rask betring og merkar etter kvart berre litt forskjell frå før skaden. Andre kan ha større vanskar. Utviklinga kjem an på kva som er årsaka til språkvanskane. Betring kan også skje på lang sikt.
Det er vanskeleg å miste tilgang til språket. Det kan føre til endringar i forholdet til andre menneske, og kanskje også i forhold til arbeidslivet. I opplæringslova står det at du har rett til språktrening hos logoped også etter at du er skriven ut frå sjukehuset. Logopeden på sjukehuset hjelper deg med å søkje om dette.
Rehabiliteringsdøgnposten er i 3.etasje i hovudbygget til Stord sjukehus.
Fysikalsk medisinsk og rehabiliteringspoliklinikk held til i 1.etasje i gamle administrasjonsbygning (kvit trebygning).
Terapeuttenestane nytter trenings- og behandlingslokaler i 1.etasje i den kvite murbygningen til høgre for sjukehuset sin hovudinngang. Her finn du òg basseng.
Tysevegen 64
5416 Stord